कञ्चनपुर- महाकाली नदीमा निर्माणाधीन चार लेनको पक्की पुलमा आवागमन बन्द गरिएको छ । पुलको दुवैतर्फ विंगस वाल निर्माण (पर्खाल) को काम सुरु भएकाले आवागमन बन्द गरिएको हो । पुलमा शुक्रबारदेखि आवागमन बन्द छ । ठूलासाना सवारीसाधन र पैदल यात्रुलाई समेत आउजाउमा रोक लगाइएको पुल निर्माण कम्पनी कुमार श्रेष्ठ सिफइसी जेभीका इन्जिनियर किशोर पाण्डेयले बताए ।
उनका अनुसार २० दिनका लागि पुलमा आवागमन बन्द गरिएको छ । ‘दुवैतर्फ विंगस वाल निर्माण गर्नुपर्ने भएकाले बाटो ब्लक भएको छ,’ इन्जिनियर पाण्डेयले भने, ‘नयाँ वर्षमा खोल्ने गरी धमाधम काम भइरहेको छ ।’ उनका अनुसार पुलको दुवै छेउमा गहिरो खाल्डो खनेर पर्खाल निर्माण भइरहेको छ, जसका कारण बाटो आफै बन्द हुन पुगेको छ ।
पक्की पुलमा आवागमन बन्द भएपछि दोधारा चाँदनीवासी समस्यामा परेका छन् । साना सवारीसाधन र पैदल यात्रुले झोलुंगे पुल भएर यात्रा गर्नुपर्नेछ । ठूला सवारीसाधन ठप्प हुनेछन् । पुल बन्द हुँदा निकै समस्या भएको दोधारा चाँदनी नगरपालिका १ का स्थानीय अर्जुनदत्त भट्टले बताए । उनका अनुसार कुखुरा पालक किसानदेखि तरकारी उत्पादकहरू ठूलो मारमा परेका छन् । कुखुराको दाना ढुवानीदेखि कुखुरा महेन्द्रनगरसम्म पुर्याउन निकै समस्या भएको छ ।
तरकारी ढुवानीमा समेत अप्ठेरो भएको भट्ट बताउँछन् । चार लेनमध्ये दुई लेन भए पनि खुला राख्नुपर्ने उनको भनाइ छ । पुल निर्माणको काम चलिरहेकै बेला झन्डै दुई वर्षअघि निर्माण कम्पनीले डाइभर्सन बनाएर महाकालीपारिको दोधारा चाँदनीका बासिन्दालाई आउजाउ गर्न सहज गरिएको थियो । अघिल्लो वर्षको भीषण बाढीले पहुँच मार्ग भत्काएपछि केही समय अवरुद्ध भएको आवागमन सडक निर्माणपछि पुनः सञ्चालन भएको थियो ।
दुवैतर्फ पर्खाल निर्माण भए पनि पुलको काम सकिनेछ । अहिले पर्खाल निर्माणसँगै पुलको दुवैतर्फ बन्ने पोखरीको काम चलिरहेको छ । पहुँच मार्गको काम पनि अन्तिम चरणमा रहेको इन्जिनियर पाण्डेयले बताए । उनका अनुसार पुलको दुवैतर्फ करिब चाररपाँच सय मिटर मात्रै पहुँच मार्ग निर्माणको काम बाँकी छ । गड्डाचौकीदेखि दोधारा चाँदनीको मलेरिया नालासम्म साढे ८ किलोमिटर पहुँच मार्ग निर्माण गर्नुपर्ने छ ।
अहिले पुलको पूर्वपट्टि भीमदत्त नगरपालिकातर्फको पोखरी निर्माणको काम चलिरहेको छ । बर्खाअगावै उक्त पोखरीको काम सक्ने लक्ष्य रहेको निर्माण कम्पनीले जनाएको छ । बर्खापछि पश्चिमपट्टि दोधारा चाँदनीतर्फको पोखरी निर्माण हुनेछ । पुलको डिजाइनअनुसार दुवैतर्फ ६ सय मिटर चौडा र २६ सय मिटर लम्बाइका दुई पोखरी निर्माण गर्नुपर्नेछ ।
निर्माणाधीन चार लेनको पक्की पुललाई दोधारा चाँदनीमा बन्ने भनेको सुक्खा बन्दरगाहको प्रमुख पूर्वाधारका रूपमा लिइएको छ । दोधारा चाँदनी नगरपालिका १ मा निर्माण हुने सुक्खा बन्दरगाहको विस्तृत परियोजना प्रतिवेदन ९डीपीआर० निर्माणको काम अन्तिम चरणमा रहेको इन्टरमोडल यातायात विकास समितिले जनाएको छ ।
