धनगढी- प्रहरीले कैलालीबाट रु. ४ लाख २ हजार ६ सय बराबरको अवैध भन्सार छलीको सामान बरामद गरेको छ । प्रहरीले शुक्रबार जिल्लाका विभिन्न ठाउँबाट भन्सार छलीका सामान बरामद गरेको हो ।

वडा प्रहरी कार्यालय धनगढीबाट खटिएको प्रहरी टोलीले धनगढी उपमहानगरपालिका –२ राम जानकी मन्दिर नजिक भारतबाट भन्सार छली गरि ल्याएको रु.२ लाख १२ हजार बराबरको ६ सय २० जोर जेन्स मोजा र ४ सय ४० जोर लेडिज मोजा बरामद गरेको जिल्ला प्रहरी कार्यालय कैलालीका प्रवक्ता प्रहरी निरीक्षक गंगादत्त बडूले जानकारी दिए ।

त्यस्तै सुदूरपश्चिम प्रदेश प्रहरी कार्यालय धनगढी र प्रहरी चौकी त्रिनगरबाट खटिगएको सँयुक्त टोलीले धनगढी उपमहानगरपालिका–३ स्थित भारतबाट भन्सार छली गरि ल्याएको रु.१ लाख ९० हजार ६ सय बराबरको लन्डनहर्न, Aziel र  A–kon Pro चस्मा र चस्माको ग्लास बेवारिसे अवस्थामा फेला पारी बरामद गरेको उनले जानकारी दिए । बरामद गरिएको सामान आवश्यक कार्वाहीको लागि त्रिनगर भन्सार कार्यालय बुझाइएको प्रहरीले जनाएको छ ।