काठमाडौं- प्रतिनिधिसभा निर्वाचनको मतगणना अन्तिम चरणमा पुग्दै गर्दा नेपाली कांग्रेसमा प्रधानमन्त्रीका लागि रस्साकस्सी सुरु भएको छ । निर्वाचनको देशभर अझै ६ वटा क्षेत्रको मत परिणाम आउन बाँकी छ । अहिलेसम्म एक सय ५९ सिटको परिणाम आइसकेको छ । तीन क्षेत्रको गणना भइरहेको छ भने थप तीन क्षेत्र दोलखा, बाजुरा र स्याङ्जा २ मा मतगणना सुरु नै हुन सकेको छैन ।

दोलखामा १० मतदान केन्द्रमा १५ मंसिरमा चुनाव हुँदैछ । बुथ कब्जा र धाँधली भएको भन्दै एमालेले उजुरी हालेपछि त्यहाँ पुनः मतदान हुन लागेको हो । बाजुराको बुढीनन्दा नगरपालिकामा १० मंसिरमै मतदान भइसकेको छ । तर यहाँ पनि मतगणना सुरु हुन सकेको छैन ।

यो निर्वाचनको मतगणना अन्तिम चरणमा पुग्दै गर्दा यस पटक नेपाली कांग्रेस ठूलो दल बन्ने देखिएको छ । तर एक्लै सरकार बनाउन सक्ने अवस्था भने छैन । निर्वाचनको प्रत्यक्षतर्फ सत्तागठबन्धनले बहुमत त ल्याएका छन्, तर समानुपातिक मतपरिणाम सार्वजनिक नभई सरकार बन्न सक्ने अवस्था छैन । तर पनि संसदमा सबै भन्दा ठूलो दल भएका कारण कांग्रेसले प्रधानमन्त्रीमा दाबी गर्नु स्वभाविक हो ।

कांग्रेसमा सभापति शेरबहादुर देउवा, रामचन्द्र पौडेल, प्रकाशमान सिंह, गगन थापा, शशांक कोइराला प्रधानमन्त्रीको दौडमा छन् । उसो त अहिलेको प्रत्यक्षतर्फको मत परिणाम अनुसार दोस्रो दल हुने देखिएको नेकपा एमालेका अध्यक्ष केपी शर्मा ओली पनि प्रधानमन्त्रीको दौडमा छन् । बाहिरी रुपमा मौन देखिए पनि माओवादी केन्द्रका अध्यक्ष पुष्पकमल दाहाल प्रचण्ड पनि प्रधानमन्त्रीको दौडमा छन् । तर, यसपटक उनलाई त्यति सहज भने छैन । यदि कांग्रेसकै नेतृत्वमा सरकार बनेमा दोस्रो कार्यकाल आफूले पाउनुपर्ने उनको दाबी छ । तर, उनले खुला रूपमा बोलेका छैनन् ।

कांग्रेसमा प्रधानमन्त्रीका लागि खासगरी देउवा, पौडेल र थापाबीच रस्साकस्सी छ । सबै नेताले आफू निकटका सांसदहरूलाई भेट्न थालेका छन् । उनीहरूको रायसुझाव लिइरहेका छन् ।

कांग्रेस महामन्त्री गगन थापा भने अब कांग्रेसमा अहिलेको पुस्ता प्रधानमन्त्रीका लागि योग्य रहेकाले अबको पाँच वर्षसम्म धैर्य गर्न नसक्ने बताउँदै आएका छन् । कांग्रेस नेता रामचन्द्र पौडेलले पनि प्रधानमन्त्रीका अभियान नै अगाडि बढाएका छन् । कांग्रेसभित्रको यस्तो कलहले फेरि पनि प्रधानमन्त्रीमा देउवाले नै निरन्तरता पाउने अवस्था देखिएको छ ।

उसो त अहिलेको प्रत्यक्षतर्फको मत परिणाम अनुसार नेकपा एमाले दोस्रो दल बन्ने देखिएको छ । यस कारण एमाले अध्यक्ष केपी शर्मा ओली पनि प्रधानमन्त्रीको दौडमा छन् । उनी सत्ता गठबन्धन भंग नगरी प्रधानमन्त्री बन्न सक्ने अवस्थामा छैनन् । तर पनि उनले विभिन्न दलका नेताहरूसँग छलफल अघि बढाएका छन् ।