धनगढी– नेपाली कांग्रेस सुदूरपश्चिम संसदीय दलको बैठक निष्कर्षविहीन बनेको छ । आज (मंगलबार) बसेको बैठकमा दलको नेतामा धेरले दाबी गरेपछि बैठक निष्कर्षविहीन भएको हो ।
दलको नेताका लागि प्रदेश सभामा ६ जनाले दाबी गरेका छन् । कांग्रेस प्रदेश सभापति वीरबहादुर बलायर प्रदेश बाहिर भएपछि उपसभापति लोकराज अवस्थीको अध्यक्षतामा बैठक बसेको थियो । दलको नेतामा अछामका मेघराज खड्का, कञ्चनपुरका बहादुरसिंह थापा, दिवानसिंह विष्ट, कैलालीका प्रकाश देउवा, कमल शाह र बैतडीका शिवराज भट्टले दाबी गरेका छन् ।
कांग्रेस सुदूरपश्चिम प्रदेश महामन्त्रीसमेत रहेका सांसद खड्काले दलको नेता छान्नका लागि बसेको बैठक निष्कर्षविहीन भएको बताए । दलको नेता छान्नका लागि सामान्य छलफल गरेका थियौं,’ उनले भने, ‘सहमति हुने अवस्था नआए निर्वाचनमा जानुपर्ने हुनसक्छ । अझै सहमति जुटाउने प्रयासमा छौं । प्रदेशमा ५३ सिट रहेकोमा १९ सिट ल्याएर कांग्रेस पहिलो स्थानमा छ । उनीहरूमध्ये अधिकांश संस्थापनकै छन् ।
सुदूरपश्चिममा नेपाली कांग्रेसका १९, माओवादी केन्द्रका ११, नेकपा एमालेका १०, नागरिक उन्मुक्ति पार्टीका ७, नेकपा एसका ४, राप्रपाका १ र स्वतन्त्र १ गरी ५३ सांसद छन् ।
