धनगढी, चैत १५
आगामी वैशाख ३० गते हुने स्थानीय तहको निर्वाचनका लागि कैलालीका राजनीतिक दलहरु छलफलमा जुटेका छन् । स्थानीय तहको निर्वाचनमा गठबन्धन गर्ने वा नगर्ने विषयमा सत्ता गठबन्धनमा रहेका दलहरु छलफलमा जुटका हुन् । दलहरुले मंगलबार पहिलो चरणको छलफल गरेका छन् ।

नेकपा एकीकृत समाजबादी संसदीय दलको कार्यालयमा भएको छलफलमा सत्ता गठबन्धनमा रहेका नेपाली काँग्रेससहित पाँचवटै दलका प्रतिनिधिहरुको सहभागिता रहेको थियो ।
पहिलो चरणको छलफलमा दलहरुबीच गठबन्धन गर्ने वा नगर्ने विषयमा भने यकिन निर्णय नभएको बैठकमा सहभागी नेकपा माओबादी केन्द्रका नेता रमेश धामीले बताए । उनले यही चैत २३ गते दोस्रो चरणको बैठक बस्ने निर्णय गरेर छलफल सकिएको बताए ।

‘आज गठबन्धन गर्ने वा नगर्ने भनेर यकिन निर्णय भएन,’ उनले भने, ‘सर्वप्रथम दलहरुले आन्तरिक तयारी गर्ने र दोस्रो चरणको बैठकबाट गठबन्धन गर्ने वा नगर्ने वा गरेमा कसरी गर्ने भन्ने बारेमा छलफल भयो । अब दोस्रो बैठकले निर्णय गर्छ ।’ गठबन्धन गर्ने विषयमा सबै दलहरु सकारात्मक भएको उनले बताए ।

कांग्रेस कैलाली सभापति भट्टले भने आफूले यस विषयमा वडा स्तर सम्मै धारणा बुझेर गठबन्धन गरिने बताएका थिए । उनले सहमति गरेर निर्वाचनमा जानु पर्नेमा जोड दिए । यस विषयमा २२ गते जिल्ला कार्य समितिको बैठकमा थप छलफल गरिने उनले बताए ।

बैठकमा एकीकृत समाजवादी पार्टीको तर्फबाट संसदीय दलका नेता दीर्घ सोडारी, माओवादी केन्द्रको तर्फबाट प्रदेश अध्यक्ष हरिराम चौधरी उत्सव, कैलाली इन्चार्ज हरि ज्ञवाली अखण्ड, कैलाली संयोजक लाजुराम चौधरी, नेपाली कांग्रेसको तर्फबाट जिल्ला सभापति नारायणदत्त भट्ट राजपाको तर्फबाट गयाप्रसाद चौधरी र जनमोर्चाको तर्फबाट नन्दराज भट्ट उपस्थित थिए । उनीहरूले स्थानीय तहमा गठबन्धन गर्न आवश्यक रहेको धारणा राखेका थिए ।

नेपाली काँग्रेसका सुदूरपश्चिम प्रदेश सभापति बीरबहादुर बलायरले प्रदेशमा काँग्रेसले अन्य दलसंग चुनावी गठबन्धन नगर्ने बताउँदै आएका छन् । यद्यपि नेपालली काँग्रेसले आवश्यकताका आधारमा चुनावी गठबन्धन गर्ने निर्णय गरेको छ । जिल्लामा पनि यस विषयमा छलफल अगाडि बढाइएको छ ।