डडेल्धुरा- नेपाली काँग्रेस डडेल्धुराले यही वैशाख ३० गते हुने स्थानीय निर्वाचनका क्रममा पार्टीलाई आँच आउने खालका टिकाटिप्पणी गरे कारबाही हुने चेतावनी दिएको छ ।

अपिल सार्वजनिक गर्दै काँग्रेस डडेल्ल्धुराले सामाजिक सञ्जाललगायतमा पार्टीलाई आँच आउने खालका टिकाटिपपणी नगर्न अनुरोध गर्दै यदी त्यसो भए विधानको व्यवस्था अनुरुप कार्वाही गर्ने जानकारी दिएको हो ।

काँग्रेससंग आवद्ध सबैलाई पार्टी विरुद्ध नलाग्न अपिल गरिएको छ । पार्टीका आधिकारिक उम्मेदवार बाहेक अरुले उम्मेदवारी दिएकाहरुलाई उम्मेदवारी फिर्ता लिन अपिल गरेको छ ।

‘स्थानीय निर्वाचनमा पार्टीका आधिकारिक उम्मेदवार विरुद्ध नेपाली काँग्रेससंग आवद्ध साथीहरुले दिनुभएको उम्मेदवारीका सन्दर्भमा निर्वाचन आयोगले तोकेको यही वैशाख १६ गते भित्र आफ्नो उम्मेदवारी फिर्तालिई पार्टीका आधिकारिक उम्मेदवारहरुलाई सहयोग गर्नकालागी हार्दिक अनुरोध गरिन्छ । अन्यथा पार्टीको विधानमा भएको व्यवस्था अनुरुप आवश्यक निर्णय लिन बाध्य हुने जानकारी गरिन्छ’ जिल्ला कार्य समिति सचिव शेरबहादुर भण्डारीद्धारा हस्ताक्षरित पत्रमा अपिल गरिएको छ ।

नेपाली काँग्रेस पार्टी भित्र तीब्र असन्तुष्टि बढेपछि निवर्तमान जिल्ला सभापती कर्णबहादुर मल्लको समूहले काँग्रेस बिपीबाट नेकपा एमालेसंग तालमेल गरी सातवटै पालिकामा उम्मेदवारी दिएको छ । काँग्रेस भित्रैका नेताहरुले समेत टिकट आफुले नपाएको भन्दै वडा अध्यक्षमा उम्मेदवारी दर्ता गराएका छन् ।

प्रधानमन्त्री एवं काँग्रेस केन्द्रीय सभापती शेरबहादुर देउवाकै जिल्लामा काँग्रेस कमजोर बन्दै गएपछि मंगलबार मात्रै सुदूरपश्चिम सभा सदस्य समेत रहेका निवर्तमान सभापती मल्ललाई पार्टीको साधारण सदस्य समेत नरहने गरि निष्कासन गरिएको छ ।