काठमाडौँ– अवकाश हुन लागेका नेपाल प्रहरीका महानिरीक्षक शैलेश थापा क्षेत्रीले निर्मला पन्तको बलात्कारपछिको हत्या प्रकरण सल्टाउने प्रयास असफल भएको बताएका छन्।

अवकाशमा जानु चार दिनपहिले बुधबार प्रहरी प्रधान कार्यालयमा पत्रकारहरुसँगको विदाई भेटमा थापाले अनेक प्रयास गर्दा पनि आफ्नो कार्यकालमा यो घटना सल्टाउन नसकेको बताए।

‘मेरो कार्यकालमा ब्रेक थ्रु भएको भए म अझै खुुसी हुन्थेँ। अनेक प्रयास गर्दा पनि सल्टाउन सकिएन,’ थापाले भने, ‘अब आउने आईजीपीले सल्टाउने अपेक्षा छ।’

अपराध विभागकै एआईजी संलग्न भएर पनि यो घटना सल्टाउने प्रयास गरेको थापाले बताए।

कन्चनपुरकी बालिका निर्मला पन्तको बलात्कारपछि हत्या भएको थियो। यो घटनाको अनुसन्धान टुंग्याउन नसक्ने थापा तेश्रो आईजीपी हुन्। यसअघि सर्वेन्द्र खनाल र ठाकुर ज्ञवालीले पनि यो घटनाको अनुसन्धान टुंग्याउन असफल भएका थिए।

आफू आईजीपी हुँदा देशमा भएका ठूला अपराध कुनै पनि कानुनी दायराबाहिर नगएको दाबी गर्दै थापाले पहिले भएको यो घटना पनि आफूले सल्टाउने प्रयास गरेको बताए। २२ महिनापहिले आईजीपी भएका थापा यही वैशाख १९ गतेदेखि अनिवार्य अवकाशमा जाँदै छन्। अवकाशमा जानुपहिले उनले आफ्ना उपलब्धि सार्वजनिक गरेका हुन्।

थापाको पुरै कार्यकाल कोभिड महामारीमा बिते पनि प्रहरीभित्र उनले उल्लेख्य सुधार गरेका छन्। खासगरी तल्लो दर्जाका प्रहरी आईजीपी थापाको निर्णयबाट लाभान्वित छन्।

उनले १६ वर्षमै सिपाही, हवल्दारले पेन्सन पाउने व्यवस्था गर्ने प्रयास गरे पनि सरकारले निर्णय गरिसकेको छैन। सहमतिका लागि गृह मन्त्रालयले अर्थ मन्त्रालयमा पठाएको छ। अर्थले सहमति दिएपछि गृहले मन्त्रिपरिषदमा लैजाने छ। मन्त्रिपरिषद्को निर्णय पछि जवान र हवल्दारको पेन्सन १६ वर्ष सेवाअवधि पुगेपछि हुनेछ।

थापाकै कार्यकालमा प्रहरीको तल्लो तहमा तीन वटा पद थप भएर ती पदमा बढुवा समेत गरिएको छ। वरिष्ठ नायव निरीक्षक, वरिष्ठ हवल्दार र सहायक हवल्दार पद थपिएको हो।

यस्तै प्रहरी परिचरको हितमा पनि थापाले निर्णय गराएका छन्। प्रहरी परिचर जुन पदमा आयो, त्यही पदमा अवकाश हुनु पर्ने अवस्थाको अन्त्य भएको छ। अब अवकाश हुँदा परिचरले पनि जुनियर अधिकृत सरहको सुविधा पाउने छन्। सेवा अवधिका आधारमा परिचरलाई ५ तहमा वर्गीकरण गरिएको छ। रासन भत्ता १५ प्रतिशत बढेको छ। पोसाकमा पनि सुविधा बढेको छ।