डडेल्धुरा – डडेल्धुरास्थित भागेश्वर गाउँपालिकाको अध्यक्ष पदका उम्मेदवार खडक ठकुराठीको घोषणापत्र सामाजिक सञ्जालमा भाइरल भइरहेको छ। स्वतन्त्र उम्मेदवार ठकुराठीले घोषणापत्रमा हेलिकोप्ट रबाट बीउ छर्नेदेखि जनताको घरमा ३६५ दिन नै दशैँ मनाउने सम्मका कार्यक्रम समेटेपछि उनको घोषणापत्र भाइरल बनेको हो।

ठकुराठीले आफ्नो घोषणापत्रमा ८ वटा बुँदा समेटेका छन्। उनले दुई वर्षभित्रमा भागेश्वर गाउँपालिकाका जनताहरूको आधारभूत आवश्यकता पूर्ति गरी आवश्यक संरचना बनाएर गाउँपालिकालाई नगरपालिकामा घोषणा गरिने प्रतिवद्धता व्यक्त गरेका छन्।

‘गाउँपालिकाको जनसंख्या बढ्दै गइरहेको छ। नगरपालिका मात्रै होइन विकास गर्दै जाने हो भने महानगर नै बनाउन सकिन्छ नि हजुर,’ उनले भने। गैरीबगडदेखि परशुराम नगरपालिकासम्म महाकाली नदीमा चार वर्षभित्रमा सुख्खा बन्दरगाह निर्माण गरी नेपाली झण्डा बाहक पानी जहाज चलाइने उनको घोषणापत्रमा उल्लेख छ।

उनले चितवनमा चलेजस्तै यहाँको महाकाली नदीको पानीमा जहाज चलाउन सकिने दाबी गरे। ‘महाकाली नदीमा जहाज चलाउने जायज हो। चितवनमा जसरी चलेको छ, त्यसैगरी यहाँ पनि चलाउन सकिन्छ,’ उनले भने, ‘भारतसँगको सीमा गैरीबगडदेखि परशुरामसम्म निकै समथल छ। त्यहाँ मज्जाले पानी जहाज चलाउन सकिन्छ।’

जनताहरूलाई सुख, समृद्धि र शान्तिको पूर्ण प्रत्याभूति दिलाई आनन्दित जनताहरूलाई ३ सय ६५ दिन नै दशैँ मनाउने वातावरण मिलाउने उनले वाचा गरेका छन्।उनले कृषिलाई महत्वपूर्ण प्राथमिकतामा राखी भागेश्वरको खेतीयोग्य जमिनमा मौसमअनुसार हेलिकप्टरबाट बीउ छर्ने र हेलिकप्टरबाटै सिँचाइको व्यवस्था मिलाइने जनाए।

निर्वाचन अधिकृतको कार्यालयबाट पुतली चिह्न पाएर चुनावी प्रचार–प्रसारमा होमिएका ठकुराठीले जनताको स्वास्थ्य प्रति प्रतिबद्ध रही पशुपालन तथा कृषिमा टेवा पुग्ने उद्देश्यले गाई, भैँसी तथा बाख्राहरूलाई समेत अस्पतालमा सुत्केरी हुने व्यवस्था गराइने पनि घोषणापमत्रमा उल्लेख गरेका छन्।

यसैगरी उनले टप्वाको डाँडादेखि भागेश्वोर मन्दिरसम्म भक्तजनहरूलाई लक्षित गरी केबुलकार निर्माण गरिने तथा बेरोजगार युवालाई भत्ताका साथै सीपमूलक तालिम प्रदान गर्ने बताए।

उनको चुनावी नारा ‘हर–हर ठकुराठी, घर–घर ठकुराठी’ छ। उनले आफू अहिले घरदैलो अभियानमा व्यस्त रहेको बताए। ३४ वर्षीय पूर्व सशस्त्र प्रहरीका जवानसमेत रहेका ठकुराठी चुनाव जित्नेमा विश्वस्त छन्।

यसका साथै उनले घोषणापत्रमा समेटिएका विषयहरू आफूले पाँच वर्षमा पूरा गर्ने दाबी गरे। ‘यी सबै कुराहरू मैले गर्ने होइन। राज्यले गर्ने हो। सबै कुरा हुन्छ,’ उनले भने, ‘पहिले हाम्रो रुपालमा सडक थिएन। प्रधानमन्त्री शेरबहादुर देउवालाई हामीले १० पटकसम्म त ज्ञापनपत्र नै बुझायौँ। अहिले यहाँ सडक बनेको छ। विकास विस्तारै हुन्छ। मैले भनेको कुराहरू पनि हुन्छन्।’

उनले आफ्ना योजना देखेर मतदाता पनि खुशी रहेको बताए। ‘मेरो चुनावी एजेण्डाहरू यिनै हुन्। जनता खुशी छन्। यहाँका युवाहरूले मलाई र मेरा एजेण्डलाई रुचाएका छन्,’ उनले भने, ‘म एउटा गरिबको छोरा हूँ। मतदाताले दलहरूले केही गर्न सकेनन्, शासकहरू मात्रै आए भन्छन्।’

उनले आफू कुनै पार्टीको पनि सदस्य नरहेको दाबीसमेत गरेका छन्। उनले आफू जनताको मागअनुसार नै चुनावी मैदानमा उत्रिएको सुनाए। उनी जिल्ला सदरमुकाममा इलेक्ट्रोनिक सामान मर्मतको कामसमेत गर्छन्।