धनगढी- सुदूरपश्चिम प्रदेशका मुख्यमन्त्री कमलबहादुर शाहले साहित्यले समाजका थुप्रै समस्यालाई उजागर गर्दै समाधानतर्फ डोर्याइरहेको बताएका छन् । सुदूरपश्चिमाञ्चल साहित्य समाजको आयोजनामा शुक्रबारदेखि धनगढीमा सुरु भएको विश्व नेपाली नारी साहित्य सम्मेलनको उद्घाटन गर्दै उनले यस्तो धारणा राखेका हुन् ।

सुदूरपश्चिमाञ्चल साहित्य समाजले साहित्य कार्यक्रमहरुका माध्यबाट सुदूरपश्चिमसहित विश्व नेपाली समाजलाई जोडन खोजेको बताएको उनले बताए । ‘हाम्रो कला सांकृति, पहिचान, प्राकृतिक स्रोत र साधनको उपयोगमा साहित्यको ठूलो भूमिका छ,’ उनले भने । उनले प्रदेश सरकार सुदूरपश्चिम साहित्य समाजसंग सहकार्य गरेर जान तयार रहेकोसमेत उनले बताए ।

साहित्य क्षेत्रले यहाँको कला संस्कृतिलाई थप वृहत बनाउन मद्दत पुग्ने भन्दै उनले ‘साहित्य क्षेत्रसँग म जोडिएको छु र निरन्तर तपाईहरुसंग जोडिएर अगाडि बढन चाहन्छु ।’ धनगढीमा शुक्रबारदेखि सुरु भएको महोत्सव सोमबारसम्म चल्नेछ ।