डोटी– डोटीको सायल गाउँपालिकाको अध्यक्षमा नेपाली कांग्रेसका धर्मराज जोशी निर्वाचित भएका छन्। एमालेका उम्मेदवार तेजबहादुर डुम्रेललाई पराजित गर्दै जोशी निर्वाचित भएका हुन्। उनीहरू दुबैजना २०७४ को स्थानीय तह निर्वाचनका पनि प्रतिस्पर्धी हुन्। त्यतिबेला डुम्रेल निर्वाचित भएका थिए।
यसपटक अध्यक्षमा जोशीले ३ हजार २४३ मत प्राप्त गरी जीत हासिल गर्दा डुम्रेलले २ हजार २४० मत प्राप्त गरे। नेकपा एकीकृत समाजवादीसँगको तालमेलमा उठेका नेकपा माओवादी केन्द्रका उम्मेदवार डबलबहादुर साउदले ५ सय ३२ मत प्राप्त गरे।
उपाध्यक्षमा पनि कांग्रेसकै निर्मला बोहरा ओली निर्वाचित भइन्। उनले २ हजार ९३७ मत प्राप्त गर्दा निकटतम प्रतिद्वन्द्वी एमालेकी विश्नादेवी सिंहले २ हजार १५४ मत प्राप्त गरिन्। सिंह निवर्तमान उपाध्यक्ष हुन्। यस्तै माओवादी केन्द्रसँगको तालमेलमा उठेका नेकपा एसका टिका सिंहले ६ सय २६ मत प्राप्त गरे।
६ वटा वडा रहेको सायल गाउँपालिकामा ५ वटामा कांग्रेस जित्दा एकमा एमाले जित्यो। अघिल्लो निर्वाचनमा एकमात्रै कांग्रेसले जितेको थियो भने, पाँचमा एमाले जितेको थियो।
यसपटक वडा नम्बर १ मा एमालेका लालबहादुर रोकायाको प्यानल विजयी हुँदा बाँकी वडामा कांग्रेसको प्यानल विजयी भए। जसमा वडा नम्बर २ मा मानबहादुर सिंह, वडा नम्बर ३ मा नवराज उपाध्याय, वडा नम्बर ४ मा जगतबहादुर सिंह, वडा नम्बर ५ मा बहादुर साउद र वडा नम्बर ६ मा दीपकबहादुर साउदको प्यानल विजयी भएको छ।
योसँगै डोटीका नौ स्थानीय तहमध्ये छ स्थानीय तहको नतिजा सार्वजनिक भइसकेको छ। जसमा चार पालिकामा नेपाली कांग्रेसले जित हात पारेको छ भने एउटामा नेकपा एमाले र एउटामा नेकपा माओवादीले जित निकालेको छ।
डोटीको बडीकेदार गाउँपालिका, पूर्वीचौकी गाउँपालिका, आदर्श गाउँपालिका र आदर्श गाउँपालिकामा नेपाली कांग्रेसले जितेको छ भने जोरायल गाउँपालिकामा नेकपा एमाले र बोगटान फुड्सलि गाउँपालिकामा नेकपा माओवादीले जितेको छ।
दुईवटा नगरपालिका-शिखर नगरपालिका र दिपायल सपलगढी नगरपालिका तथा केआईसिंह गाउँपालिकामा मतगणना जारी छ। बाँकी तीनवटै स्थानीय तहमा नेपाली कांग्रेसले ठूलो मतअन्तरले अग्रता लिएको छ।
