डिभिजन वन कार्यालय धनगढी अन्तरगतका दसवटा सव डिभिजनबाट सेवा बिस्तार भएको छ । सव डिभिजन वन अन्तरगतका वनहरुमा चोरी,तस्करी, अतिक्रमण नियन्त्रणमा के कस्ता उपल्ब्धी भईरहेका छन् भन्ने बिषयमा डिभिजन वन कार्यालय धनगढीका प्रमुख एवं डिभिजनल वन अधिकृत रामचन्द्र कँडेल सँग निशाना न्युजले गरेको कुराकानी प्रस्तुत गरेका छौँ ।

तपाइको कार्यकालमा काठ चोरी,तस्करी नियन्त्रणमा के–के काम भईरहेका छन ?

मेरो कार्यकालमा डिभिजन वन अन्तरगतका दस सव डिभिजनमा कार्यरत कर्मचारी वन रक्षकहरु अनुगमनमा गईरहेका छन । चोरी तस्करी पैठारी हुन नदिन उनीहरु रात दिन फिल्डमा जाने गरेका कारण पनि चोरी तस्करी नियन्त्रणमा कमी आइहेको छ । चालु आवमा मात्रै चोरी निकासीका १२ मुद्धा रहेका छन् । समाजमा जनचेतना फैलाउने कामहरु पनि भइरहेका छन् । सबै मिलेर वन जोगाउ ,चोरी तस्करी हुन नदिउ भन्दै सबैलाई जागरुक गरी नियन्त्रणका पहलहरु भईरहेका छन ।

अतिक्रमित क्षेत्र हटाउने प्रयास भएका छन ?

वन अतिक्रमण रोक्ने मेरो पहिलो कर्तव्य भित्र परेको छ । अतिक्रमण हटाउने प्रयास भइरहेका छन , हामीले ताकेगडा,पनेरुगडा, गोदावरी,चौमाला क्षेत्रमा भएका अतिक्रमण हटाइ सकेका छौँ भने गोदावरी नगर क्षेत्रमा बनाइरहेका दुईवटा भवन भत्काएका छौँ । वन अतिक्रमण रोक्ने जिम्मा वनको मात्रै हो भन्ने सोचाइका कारण अहिले समस्या आईरहेको छ । राजनीतिक दल, स्थानीय तह सबैको दायित्व भित्र वन अतिक्रमण रोक्नु पर्ने हुनाले सबैको साथ आवश्यक छ । नयाँ अतिक्रमण हुन दिएका छैनौँ । छ भने हटाएका छौँ ।अर्को संस्थागत अतिक्रमण हटाउन राज्यको नीतिमा भर पर्ने भएका कारण हामी हटाउन सक्दैनाँै अन्य स्थानमा हुने अतिक्रमण हामी हटाइरहेका छौँ ।

यस क्षेत्रमा वन जोगाउने पहल गर्नु भएको छ ?

हामी वन जोगाउनका लागि गस्ती परिचालन,जनपरिचालन,जनचेतनाका कामलाई अगाडि बढाइरहेका छौँ । समाजमा भएका विभिन्न तह तप्काका ब्यक्तीहरुसँग सहकार्य गर्दै अघि बढीरहेका छौँ भने अतिक्रमण हटाएका क्षेत्रहरुमा नयाँ बिरुवा रोप्ने कामलाई पनि सँगै अगाडि बढाईरहेका छौँ । वन जंगलमा लाग्ने डढेलोको बिषयमा पनि उपभोक्ता, समाजका सबै तह तप्काका ब्यक्तीहरुमा जनचेतना फैलाउने काम लाई पनि निरन्तरता दिएका छौँ ।

वैज्ञानिक वन व्यवस्थापन लागु भएका समुदायिक वनमा काटिएका काठको बिक्री वितरणका बिषयमा के गर्दै हुनुहुन्छ ?

चार बर्ष जति भयो त्यस्ता सामुदायिक वनमा काटिएका काठको बिक्री वितरणका लागि नीतिगत फायल प्रदेश मन्त्रालयमा पठाएका छौँ । मन्त्रालयको निर्णय आएपछि मात्र काम अघि बढ्छ । वन व्यवस्थापन गर्न जरुरी छ । काठ उपभोक्तालाई आवश्यक छ । त्यसका लागि कार्ययोजना बनाएर बिक्री वितरण गर्नु पर्छ निकास आउछ होला ।

अहिले ठूलो समस्याको बिषय पिच सडकमा भएका रुखहरुको छ,यसको निकासको लागि के काम भएका छन ?

यस क्षेत्रको मेन समस्या पिच सडकमा परेका रुखको समस्या रहेछ । जसका कारण दुर्घटनाको जोखिम पनि विकराल समस्या रहेछ । भोगाधिकार भएको भए केही समस्या हुने थिएन यो समस्या समाधानका लागि पनि मन्त्रालयमा पत्र पठाएका छौँ । निकास आउछ भन्ने हामीलाई लागेको छ ।