महेन्द्रनगर– कञ्चनपुरको भीमदत्त नगरपालिका ४ स्थित भीमदत्त नगर विकास समितिको जग्गामा अवैध रूपमा रहेको भवनको छत ढलानमा सरकारी रकम प्रयोग गरिएको छ । केही वर्षदेखि दलित छात्रावासको नाममा नगर विकास समितिको जग्गा कब्जा गरी निर्माणाधीन भवनको छत सरकारी रकममा ढलान गरिएको हो ।
वन कार्यालय नजिक जीर्ण जडीबुटी गोदामसँगको नगर विकासको जग्गा कब्जा गरी छात्रावास बनाउन थालिएको थियो । नगर विकासको जग्गा कब्जा गरी बनाइएको भवनमा हालसम्म सरकारी पैसा नै खर्च भइरहेको जानकारी प्राप्त भएको छ । स्रोतका अनुसार यस वर्ष संघ सरकारले २० लाख रुपैयाँ दिएपछि उक्त छत ढलानलगायतका कार्य भइरहेका छ ।
त्यसैगरी उक्त छत ढलान बाहेक हालसम्म भवनमा ४३ लाखभन्दा बढी रुपैयाँ खर्च भएको छ भने, त्यसमा सबैभन्दा बढी शान्ति तथा पुनः निर्माण मन्त्रालयको २३ लाख रुपैयाँ खर्च भएको स्रोतले जानकारी दिएको छ ।
२०७३ सालमा भवन बनाउन मन्त्रालयले सहयोग गरेको थियो । उक्त अवैध भवन बनाउन सहयोग गर्नेमा तत्कालीन शान्ति तथा पुनः निर्माण मन्त्रालयसहित कञ्चनपुरको बेदकोट नगरपालिका, शुक्लाफाँटा नगरपालिका, दोधारा चाँदनी नगरपालिका र २०७० सालको संविधान सभाका दुई जना सभा सदस्य समेत रहेका छन् । मन्त्रालयपछि बेदकोट नगरपालिकाले ६ लाख रुपैयाँ सहयोग गरेको स्रोतले जनाएको छ ।
स्रोतका अनुसार बेदकोट नगरपालिकाले आर्थिक वर्ष २०७७र०७८ सालमा उक्त भवन निर्माणमा सहयोग गरेको थियो भने, शुक्लाफाँटा नगरपालिकाले २०७५ सालमा १ लाख रुपैयाँ, दोधारा चाँदनी नगरपालिकाले उक्त वर्ष नै २ लाख र दुई सभा सदस्यले १२ लाख सहयोग गरेको जनाएको छ ।
त्यसैगरी नगर विकास समितिले दलित छात्रावास बनाउन जग्गा लिज वा पूर्जा नदिएको स्रोतको भनाइ छ । नगर विकास समितिका कर्मचारीहरूका अनुसार राजनीतिक पहुँचका आधारमा नगर विकासको जग्गा कब्जा गरी छात्रावास बनाउन थालिएको बताए । उक्त छात्रावासका लागि जग्गा नदिएको र राजनीतिक पहुँचका आधारमा कब्जा गरी बनाइएको नगर विकास समितिका कर्मचारीको भनाइ छ ।
भीमदत्त कार्यपालिका सदस्य हरिहर परियाले अहिले भवनको छत ढलानको नेतृत्व गरेका छन् । नगर विकासको अवैध संरचना भत्काउन क्रान्तिकारी माओवादीको युवा संगठनले नगर विकास समितिमा कालो ब्यानर समेत लगाएका थिए भने संगठनको ब्यानर हटाएको केही दिन दलित छात्रावासको अवैध निर्माणाधीन संरचनाको छत ढलान गरिएको हो । कारोबारबाट
