धनगढी- कञ्चनपुरको कृष्णपुर नगरपालिका– १, स्थित ओदाल खोलामा पुल निर्माणको काम सात वर्षसम्म पनि अधुरै छ । पुल निर्माणमा भइरहेको ढिलाईले स्थानीय बासिन्दाले खोला तर्दा भोग्नुपर्ने सास्ती हट्न सकेको छैन । बंक–नाइल–बुडर सडकअन्तर्गत ओदाल खोलामा पुल निर्माणका लागि ०७३ भदौमा थेगिम–गाल्वा जेभीसँग सम्झौता भएको थियो ।

निर्माण कम्पनिलाई १८ महिना भित्रै पुलको काम सम्पन्न गर्न समय सिमा दिइएको थियो । सडक डिभिजन कार्यालय कञ्चनपुरका अनुसार पुलका दुई स्पानमध्ये सात वर्षको अवधिमा एउटा स्पान मात्र बनेको छ । तर केही दिन अघि दोस्रो स्पानको काम सुरु भइरहेकोे छ । पुल नहुँदा स्थानीयले बर्खायाममा खोला तर्न निकै सास्ती खेप्नुपर्छ ।

चुरेको फेदी भएर बग्ने यो खोला बर्खामा उर्लने भएकाले खोलापारिका बस्तीका बासिन्दालाई वारि र वारिको बस्तीका बासिन्दालाई पारि जान समस्या हुने गरेको स्थानीय बताउँछन् । खोलाको उत्तरतिर चुरेनजिक पर्ने सुन्दरीफाँटा र पहरिया गरी दुई गाउँ छन् । यी दुई बस्तीलाई खोलावारि जोड्ने अरु विकल्प छैन् ।

कृष्णपुर– १, पहरियाका ईश्वरबहादुर बुढाले ठेकदारका लापरबाहीका कारणले गर्दा समयमै पुल निर्माण हुन नसकेको बताए । पुल निर्माण देखि नै ठेकदारले काम गर्न नसेकेका कारण अहिलेसम्म पुल निर्माण हुन सकेको उनले बताए । ‘पुल बन्यो भने १२ सय घरपरिवार खोलापारी छन् । ती परिवारलाई सडक सञ्जालसँग जोडन सकिन्छ,’ उनले भने ।

अर्का स्थानीय नन्दीराम भुलले पुल निर्माणका लागि बेला बेलामा धेरै पटक प्रयास गरेपनि अहिले सम्म पुल निर्माण हुन नसकेको बताए । पुल नहुँदा बर्खामा बाढी आएको वेला खोला तारेर बिरामीलाई अस्पताल पु¥याउन समस्या हुने गरेको उनले बताए । ‘बिरामी, सुत्केरी, सर्पले टोकेका बिरामीलाई अस्पताल पु¥याउन सकिँदैन ।

हामी खोलापारि जान पाउँदैनौँ,’ उनले दुःखेसो सुनाए, ‘पुल नहुँदा बिरामीलाई समयमै अस्पताल पु¥याउन नसकेर ज्यान गुमाउनुपर्ने अवस्था छ ।’ गाउँबाट खोलापारि रहेको पहरिया गाउँको स्कुलमा अध्ययनका लागि जाने विद्यार्थीले खोला तर्न सास्ती खेप्नुपरेको उनले बताए । बर्खामा छोराछोरीलाई स्कुल पठाउन वारिपारि डोरी राखेर खोला तार्ने गरेको उनको भनाइ छ ।

सोही क्षेत्रबाट निर्वाचित सुदूरपश्चिम प्रदेश सभा सदस्य ओमविक्रम भाटले जनप्रतिनिधिका हैसियतले निर्माण कम्पनीलाई काम गर्न पटक–पटक आग्रह गरेपछि पुल निर्माणको काम सुचारु भएको बताए । आफूले चुनाव जितिसकेपछि पटक–पटक पुल निर्माणका सम्बन्धीत व्यक्तीहरु सँग छलफल, संम्वादपछि बल पुल निर्माणको काम सुरु भएको उनले बताए । ‘यस वर्ष भित्रै पुल निर्माणको काम सम्पन्न हुन्छ,’ भाटले भने, ‘आउने वर्सोदमा यहाँका स्थानीय बासिले अब पुलमा चढ्न पाउने छन्,’ । पुलको निर्माण सम्पन्न नहुँदा सम्म आफू लागि राख्ने उनले बताए ।

सडक डिभिजन कार्यालय कञ्चनपुरका अनुसार पाँच करोड ४७ लाख रूपैयाँ लागत रहेको पुलको लम्बाइ ७० मिटर छ । हालसम्म तीन करोड ३६ लाख भुक्तानी भइसकेको र दुई करोड ११ लाख भुक्तानी हुन बाँकी रहेको डिभिजन कार्यालयका सूचना अधिकारी तारानाथ सिग्देलले बताए ।

सुरुको सम्झौता अनुसार १८ महिनामा काम सक्नुपर्ने भए पनि सात वर्षको अवधिमा करिब ७५ प्रतिशत मात्र भौतिक प्रगति भएको उनले बताए । ‘अहिले दैनिक हर्जाना तिराएर काम गराइरहेका छौँ, निर्माण कम्पनीले अस्तिदेखि काम सुरु गरेको भनेको छ,’उनले भने । कानुन अनुसार दैनिक हर्जाना तिरेर दुई सय दिनभित्र पनि काम पूरा नगरे ठेक्का तोडेर कारबाहीको प्रक्रियामा जाने सिग्देलले बताए ।