धनगढी – कैलालीको धनगढी उपमहानगरपालिका- ८ क्याम्पस रोडमा रहेको एरिस्टो बोर्डिङ स्कुलले-१२ जुगेडामा रहेको बेहडाबाबा आधारभूत विद्यालयलाई शैक्षिक सामाग्री सहयोग गरेको छ । आइतबार एक कार्यक्रमका बिच एरिस्टोकि प्रबन्ध निर्देशक शान्ति अधिकारी क्षेत्री स्वयं उपस्थित भई करिब असी हजार बराबरको पाठ्यपुस्तक विद्यालयलाई हस्तान्तरण गरेकी हुन ।

हस्तान्तरणपछि उनले राज्यको प्रत्यक्ष लगानी रहेको सामुदायिक विद्यालयको शैक्षिक गुणस्तर बढाएर राम्रो शिक्षा प्रदान गर्नुपर्ने बताईन । उनले एरिस्टो मावि जहिल्यै समाज सुधारको पक्षमा रहेको भन्दै आगामी दिनमा पनि बेहडाबाबा आधारभूत विद्यालयलाई आफ्नो विद्यालयले सक्दो सहयोग गरिरहने प्रतिबद्धता व्यक्त गरिन । तीन दशकदेखि शैक्षिक गतिविधिमा सक्रिय एरिस्टो बोर्डिङ स्कुल गुणस्तरीय शिक्षाका कारण सुदूरपश्चिम भरी लोकप्रिय छ ।

त्यस्तै बेहडाबाबालाई दरबार स्कुलले पनि शैक्षिक सामाग्री सहयोग गरेको छ । दरबार स्कुलका प्रिन्सिपल पृथ्वी शाहले परिस्थितिले आफूले निजी विद्यालय सञ्चालन गरिरहेको भएपनी मनभने सामुदायिक विद्यालयमै रहेको बताए । उनले एउटा शिक्षकको वर्षभरीको तलब दरबार स्कुलले बेहोर्ने समेत प्रतिबद्धता व्यक्त गरे। बेहडाबाबामा कक्षा १ देखि ५ सम्म अङ्ग्रेजी माध्यमबाट पढाइ हुँदै आएको छ । विद्यालयमा अहिले दुई सय बढी विद्यार्थी अध्ययनरत रहेको प्रधानाध्यापक निर्मला चौधरीले बताईन ।

भौतिक पूर्वाधार जीर्ण रहेको बेहडाबाबालाई यस्तै मनकारी व्यक्तिहरूको खाँचो रहेको प्रधानाध्यापक चौधरी बताउँछन् । अघिल्लो वर्ष धनगढी उपमहानगरपालिकाले विद्यालय मर्ज गर्न खोज्दा स्थानीयले आफ्ना नानीबाबुलाई पठनपाठनमा समस्या हुने र टाढा जान नसक्ने भन्दै मर्ज गर्न नदिएको विद्यालका संस्थापक सदस्य कालु सिंह धामीले बताए ।

त्यस्तै विद्यालय व्यवस्थापन समिति सदस्य राम भट्टले भने एकातिर बोर्डिङ स्कुलको प्रतिस्पर्धा अर्कोतिर नगरपालिकाको विद्यालय मर्ज गर्ने अभियानले बेहडाबाबा विद्यालयको नाम निसाना मेटिन खोजिएको थियो तर हामीले यो हुन दिएनौँ ,हामीले समुदायका बौद्धिक व्यक्तिहरूसँग बसेर विद्यालयलाई जसरी पनि सञ्चालन गर्ने सल्लाह भयो अहिले सबैले आफ्ना नानीबाबु भर्ना गर्नुभयो अब गुणस्तरीय शिक्षामा जोड दिन्छौँ ।