धनगढी- सुदूरपश्चिम प्रदेशमा रहेका ३० प्रतिशत सामुदायिक वनहरूमा वन डढेलो लागेको छ । प्रदेश बन निर्देशनालयले दिएको जानकारी अनुसार तीन हजार चारसय सामुदायिक वनहरू मध्ये ३० प्रतिशतमा वन डढेलो लागेको छ ।

जिल्लाहरूबाट आएको सूचना अनुसार हालसम्म ३० प्रतिशत सामुदायिक वनहरूमा वन डढेलो लागेको लागेको सूचना आएको प्रदेश बन निर्देशक हेमराज विष्टले बताए। उनका अनुसार सुदूरपश्चिम प्रदेशमा तीन हजार चार सय सामुदायिक बन रहेका छन् । ती मध्ये झण्डै ३० प्रतिशत सामुदायिक वनमा डढेलो लागेको छ । उनले आगलागी भएका सबै वनहरू पूर्ण रूपमा क्षति नभएको तर केही वनहरूमा धेरै क्षति भएको बताए। आगलागी प्रत्येक वर्ष भइरहेको बताउँदै उनले प्रत्येक वर्ष आगोले ठुलो धनजनको क्षति भइरहेको बताए ।

उनका अनुरसार पहाडमा सल्लाका पातहरू हुन्छन् छिट्टै आगो टिपिहाल्छ, तराईमा पनि गर्मी याममा सुकेका पातहरू भएका कारण आगो छिट्टै फैलिएकाृ हो । केही व्यक्तिको लापरबाहीका कारण आगो लाग्ने गरेको बताउँदै उनले त्यसलाई निरुत्साहित गर्नुको विकल्प नभएको बताए । आगो निभाउने क्रममा पनि उपभोक्ताहरूले लापरबाही गर्ने गरेको विष्टको भनाई छ । आगो निभाउनका लागि ब्याक पम्प लगायत सहयोगी सामग्रीहरूको अभाव रहेको समेत उनको भनाइ छ ।

उनले अहिलेसम्म अछामका सामुदायिक बनमा आगलागी बढी भएको जानकारी प्राप्त भएको बताए । फागुन १५ देखि जेठ १५ सम्मको आगलागीको उच्च जोखिमको समय भएका कारण सबैले सतर्कता अपनाउनु पर्ने जनाइइएको छ । जंगलमा लागेको डढेलोका कारण वर्षेनी वन्यजन्तु, वनस्पति, चराचुरुङ्गीहरूको क्षति भइरहेको जनाइएको छ । सामुदायिक वनमा लागेको डढेलो नियन्त्रण गर्न जाँदा सुदूरपश्चिममा दुईजनाले ज्यान गुमाएका छन् ।

डोटीको शिखर नगरपालिका–८ का स्थानीय खडकबहादुर भुलले र बाजुराको बडिमालिका नगरपालिका–३ स्थित घटाल सामुदायिक वनमा लागेको डढेलो नियन्त्रणका लागि खटिएकी स्थानीय उपभोक्ता थोपी खड्काको पनि जलेर मृत्यु भएको प्रदेश वन निर्देशनालय धनगढीले जनाएको छ । डढेलो निभाउन सक्ने दक्ष जनशक्ति र उपकरण नै नहुँदा समस्या भएको हो । गर्मी लामो समयदेखिको खडेरीले गर्दा वन क्षेत्रमा लागेको डढेलोका कारण ढलापडा रूख नासिननुका साथै पुनरत्पादनमा समस्या देखिएको जनाइएको छ ।