धनगढी- सुदूरपश्चिम सरकारले आगामी आव २०८१÷८२ का लागि ल्याएको बजेटले भौतिक पूर्वाधार,कृषि,शिक्षा,स्वास्थ्य,पर्यटनलगायतका क्षेत्रलाई प्राथमिकतामा राखेको छ ।

शनिबार प्रदेशसभामा आर्थिक मामिलामन्त्री सुरेन्द्रबहादुर पालले प्रस्तुत गरेको बजेटमा उक्त क्षेत्रहरुलाई प्राथकितामा राखेको हो ।
सडक पूर्वाधार, उर्जा, सिँचाई तथा नदी नियन्त्रण, खानेपानी तथा सरसफाई, आवास सहरी विकास तथा भवन निर्माण र यातायात व्यवस्था क्षेत्रको कार्यक्रम कार्यान्वयन गर्न रू. १३ अर्ब ३५ करोड विनियोजन गरिएको मन्त्री पालले बताए ।

प्रदेश गौरव, रणनीतिक महत्व र पालिका केन्द्र जोड्ने सडकको निर्माण, सुदृढीकरण तथा स्तरोन्नति कार्यलाई तीव्रताका साथ सञ्चालन गर्न बजेट विनियोजन गरिएको उनले बताए । सडक तथा सडक पुल पूर्वाधारको विगतको करारिय दायित्व र प्रदेश सरकारको स्रोत सीमिततालाई मध्यनजर गर्दै प्रदेश गौरव र बहुवर्षीय आयोजनाहरूको निर्माण सम्पन्न गर्न बजेटमा विशेष प्राथमिकता दिएको जनाइएको छ ।

प्रदेशको समग्र विकासको लागि मेरूदण्डको रूपमा रहेका रणनीतिक महत्वका खप्तड–मार्तडी, सतबाज–श्रीभावर–हाट, चिसापानी–ऋषिदह–बडिमालिका,दैजी–पोखरा–ढुङ्गाड–बझाङ्ग,खलङ्गा–खार–देथला–पारीबगर– खण्डेश्वरी, दिपायल–साइपाल, सहजपुर–बोगटान–दिपायल, बेलौरी–कलुवापुर– नाइल–बुडर, भजनी–छोटीभन्सार–खेमडी–ठुलीगाड, जयगढ–माष्टाना–रामारोसन र पाटन–पञ्चेश्वर सडक आयोजना निर्माण गर्न पर्याप्त बजेट विनियोजन गरेको मन्त्री पालले बताए ।

हालसम्म पनि सडक सञ्जालसँग नजोडिएका बझाङ्गको साईपाल, बैतडीको सिगास र दार्चुलाको अपि हिमाल गाउँपालिकाको केन्द्र जोड्ने सडकलाई उच्च प्राथमिकता दिई निर्माण कार्य अगाडि बढाउन आवश्यक बजेट विनियोजन गरिनुका साथै सडक सञ्जाल नपुगेका दुर्गम एवम् ग्रामीण क्षेत्रमा आधारभुत सेवालाई सहज र पहुँचयोग्य बनाउन झोलुङ्गे पुल निर्माण कार्यलाई निरन्तरता दिइने बजेटमा उल्लेख छ ।
प्रदेशमा रासायनिक मलको अभावलाई न्यूनीकरण गर्न गैरअनुदानित रासायनिक मलहरू एमोनियम सल्फेट र सिंगल सुपर फस्फेटका लागि रु. ८० लाख, कृषि तथा पशुपन्छी ऋणको व्याज अनुदानका लागि रु. ७ करोड २३ लाख, कृषि यान्त्रीकरणका लागि रु. ४ करोड ३४ लाख विनियोजन गरिएको छ ।

त्यस्तै कृषि अनुदानको प्रभावकारी कार्यान्वयनका लागि उत्पादनमा आधारित प्रोत्साहन अनुदान कार्यक्रम अन्तर्गत स्थानीय रैथाने बाली, सुन्तला,फलफूल, तरकारी, चैते धान, मुङ्ग, प्याज, अदुवा÷बेसार, बहुवर्षीय घाँस, अम्रिसो खेतीका लागि रु. ९ करोड ३५ लाख वित्तीय हस्तान्तरणको रूपमा विनियोजन गरिएको प्रस्तुत बजेटमा उल्लेख छ । कृषिको व्यावसायिकरण तथा सघन उत्पादन र बाली विशेष कार्यक्रम संचालनका लागि प्रत्येक जिल्लामा रु. १ करोडका दरले रु. ९ करोड विनियोजन गरिएको छ । प्रदेशलाई धान, गहुँ तथा मकैको बीउमा आत्मनिर्भर बनाउनका लागि बीउ उत्पादन सहयोग र बिउ प्रशोधन तथा बजारीकरणका लागि रु. ३ करोड २० लाख बजेट विनियोजन गरेको छ । मासु उत्पादनका लागि बाखा, ग्रामीण कुखुरा, कालिज, बंगुर तथा भैँसीपालन कार्यक्रम सञ्चालनका लागि रू. ४४ करोड १२ लाख विनियोजन गरिएको बजेटमा उल्लेख छ ।

सुदूरपश्चिम प्रदेशमा रहेका प्रमुख पर्यटकीय क्षेत्रहरू बडिमालिका, खप्तड, रामारोशन, मालिकार्जुन, गोदावारीधाम, शुक्लाफाँटा, शैलेश्वरी मन्दिर, अपि, सैपाल, बेहडाबाबा, अजयमेरूकोट, महाभारत लेक, बडिकेदार, बैद्यनाथ धाम, भम्केनी धाम, घोडाघोडी ताल, उग्रतारा मन्दिर, शुर्मादवी, टीकापुर पार्क, मेलौली भगवती, त्रिपुरासुन्दरी, गर्भादरबार, सिगास धाम, बतासे झरना लगायतका लागि रु. ८ करोड बजेट विनियोजन गरिएको छ ।

त्यस्तै शिक्षा, स्वास्थ्य, सामाजिक विकास, युवा तथा खेलकूद, भाषा, कला तथा सँस्कृति विकासका लागि रु. ६ अर्व ७४ करोड विनियोजन गरिएको जनाइएको छ ।