कैलालीको धनगढी उपमहानगरपालिका–५, हसनपुरस्थित पञ्चोदय माध्यमिक विद्यालयले शैक्षिक क्षेत्रमा छुट्टै पहिचान बनाएको छ । पञ्चोदय अंग्रेजी र नेपाली दुबै माध्यमबाट अध्यापन गराउने सामुदायिक विद्यालय हो । पञ्चोदयको समग्र शैक्षिक अवस्थाका बारेमा विद्यालयका प्राचार्य हरिशकुमार ओझाको विचार प्रस्तुत गरेका छौँ ।
यो विद्यालय वि.सं. २०२२ सालमा स्थापना भएको हो । यहाँ प्राविधिक धारको पढाइ पनि हुने गरेको छ । सिटिइभिटीबाट सम्बन्धन प्राप्त गरि १८ महिने प्रि डिप्लोमा इन इलेक्ट्रोनिक र तीन बर्षे डिप्लोमा इन इलेक्ट्रोनिकका कक्षाहरु पनि सञ्चालनमा रहेका छन् । कक्षा ११ र १२ पनि सञ्चालनमा रहेका छन् । यस विद्यालयमा दृष्टिविहीन बालबालिका पनि अध्यनरत छन् । हामी शैक्षिक क्षेत्रलाई अब्बल बनाउन लागी परेका छौँ ।
२०८० को एसइईको परीक्षामा ३ सय २ जना विद्यार्थी सम्मिलित भएका थिए । जसमा १ सय ७७ जना उत्तीर्ण भएका छन् । एसइईको नतिजा ५८ दशमलव ६० प्रतिशत आएको छ ।
१८ महिने प्रि डिप्लोमाका लागि रु २० हजार र तीन वर्षे डिप्लोमाका लागि एक लाख ८० हजार शुल्क लाग्छ । प्राविधिक क्षेत्रमा पनि विद्यार्थीको आकर्षण बढ्दो नै देखिन्छ । प्राविधिक ज्ञान भएकाहरुले बेरोजगार बस्नु पर्दैन् । यहाँबाट प्राविधिक तर्फ पढेका कतिपयले आफ्नै व्यवसाय गरेर बसेका छन् । कतिपयले हाउस वायरिङको ठेक्कापट्टा लिएर काम गरिरहेका छन् । कोही हाइड्रोपावर कम्पनीमा कार्यरत छन् भने कतिपयले विद्युत प्राधिकरणमा नाम निकालेर काम गरिहहेका छन् ।
सीप सिकेर स्वरोजगार बनेर पनि बस्न सकिन्छ । तल्लो कक्षा विद्यार्थीलाई पनि केही प्राविधिक ज्ञान होस भनेर केही समय त्यता जोड्नेकी भन्ने पनि सोचेका छौँ ।
हामीले २४ महिनाको औधोगिक प्रशिक्षार्थी तालिम पनि दिएका छौँ । जुन इलेक्ट्रोनिक सम्बन्धि नै थियो । पूर्ण निःशुल्क तालिम दियौँ । यसपटक पनि त्यो तालिम प्रदेश सरकारबाट सञ्चालन गर्ने भनेर सामाजिक विकास मन्त्रालयले प्रस्ताव आह्वान गरेको थियो । हामीले प्रस्ताव पेश गरेका छौँ । स्विकृत भयो भने तालिम सञ्चालन गर्छौँ ।
