कैलालीको अत्तरियास्थित दुर्गालक्ष्मी माध्यामिक विद्यालयको स्थापना विसं.२०३० सालमा भएको हो । स्थापना भएको झण्डै ५१ बर्ष भयो । पछिल्लो समय विद्यालयको अवस्थाका बारेमा १० बर्षदेखि नेपाली बिषय पढाउँदै आएका विद्यालयका प्राचार्य शिवराज जोशीको विचारलाई प्रस्तुत गरेका छौँ ।
कैलालीको अत्तरियास्थित दुर्गालक्ष्मी माध्यामिक विद्यालय स्थापना भएको झण्डै ५१ बर्ष भयो । बालविकासबाट सुरु गरेको विद्यालयले अहिले कक्षा १२ सम्म अध्यापन गराउँदै आएको छ । पछिल्लो समय कक्षा ९ देखि १२ सम्मका विधार्थीका लागि कम्प्युटर इन्जिनियरिङको कक्षा पनि सुरु गरिएको छ । मानविकी तथा व्यवस्थापनका संकायको पनि अध्यापन गराइन्छ । विद्यालयमा अध्ययन गर्ने विधार्थीको संख्या ३ हजार ५ सय रहेको छ ।
प्राविधिक बिषयमा विद्यार्थीको रुची बढेको छ । अझ भन्नु पर्दा कम्प्युटर इन्जिनियरिङको बिषय पढाइ सुरु भएयता विद्यार्थीको आकर्षण दैनिक बढेर गएको देखिन्छ । विद्यालयबाट कम्प्युटर इन्जिनियर अध्ययन गरेर गएका विद्यार्थीहरुले नाष्ट कलेजमा राम्रो गरिरहेका छन भने स्थानीय निकायमा रोजगारी पाएका छन । आइटीको माग बढेसँगै विद्यालयबाट पासआउट भएका विद्यार्थीले हरेक क्षेत्रमा राम्रो प्रदर्शन गरेको सुनिन्छ । हामी सन्तुष्ट छौँ ।
प्राविधिक शिक्षाको विकासका लागि के गर्न सकिन्छ हामी लाग्ने कोशिस गरिरहेका छौँ । २०७० सालबाट कम्प्युटर बिषयको पढाइ शुरु गरिएको हो । शिक्षा विभागबाट कम्प्युटर इन्जिनियरिङ बिषयको अनुमति दिए पश्चात अन्य प्राविधिक बिषय अनुमति नदिँदो रहेछ । धेरै कोशिस गर्दा पनि अनुमति पाएनौँ । ओभरसियरको कोर्ष ल्याउने तयारीमा जुटेका छौँ । फाईल अगाडि बढेको छ छिट्टै अनुमति पाइन्छ होला । विद्यार्थीका लागि प्राविधिक शिक्षा अनिवार्य भइसकेको छ । सबै स्कुलमा सो बिषयको पढाइ हुनुपर्छ भन्ने मेरो मान्यता हो ।
अहिले सरकारले पढ्दै कमाउँदैको रणनीति ल्याएको छ । सरकारले यो योजना ल्याउनुको उदेश्य नै प्राविधिक शिक्षा अनिवार्य जस्तै गर भन्न खोजेको हो की ? भन्ने मलाई लागेको छ । प्राविधिक बिषय पढेका विद्यार्थीले जुनसुकै कुनामा गएर हरेक क्षेत्रमा काम पाएको उदाहरण छन र वास्तविक रुपमा भन्नु पर्दा भोको मर्दैनन् । विद्यार्थीले एसइईमा गुणात्मक रुपले राम्रै गरेको छ । संख्यात्मकले नराम्रो छ । सामुदायिक विद्यालय अन्तरगत दुर्गालक्ष्मीमा अध्ययनरत छात्रा नितिका अवस्थीले ४ जिपीए ल्यायर प्रदेशकै उत्कृष्ट भइन । ए प्लस १६ र ए ल्याउने २१ जना विद्यार्थी रहेका छन । राम्रो नतिजा ल्याउने विद्यार्थीले राम्रै अंक ल्याएका छन । ३८ प्रतिशत विद्यार्थीहरु पास भएपनि राम्रै अंक ल्यायर पास हुँदा हामी सन्तुष्ट नै छौँ । फेल हुने विद्यार्थीका लागि स्कुलमै ट्युसन पढाएर अभ्यास गराइरहेका छौँ ।
गरिब,जेहेन्दार विद्यार्थीका लागि छात्रवृतिको व्यवस्थासँगै लगानीकर्ता हामीले पाएका छौँ । उहाँहरुबाट त्यस्ता विद्यार्थीका लागि पोशाक सम्मको व्यवस्था गरेका छौँ । पढ्न रुचाउने विद्यार्थीका लागि स्कुलले पूर्ण रुपमा सहयोग गर्छ । यताबाट अध्ययन गरि ऐश्वर्य गएका विद्यार्थीले विविएमा टपर भएका छन । गुणस्तरीय शिक्षासँगै प्राविधिक शिक्षालाई विकास गर्दै अझै यो भन्दा उचाईमा पुर्याउने लक्ष्यका साथ शिक्षक/शिक्षिका दिनरात नभनि खटिनुभएको छ । शिक्षालाई गुणस्तरीय बनाउन अरुभन्दा फरक ढंगबाट दुर्गालक्ष्मी प्रस्तुत हुने कुरा म अवगत गराउँछु ।
