स्वस्तिक कार्डियो एण्ड मल्टिस्पेसियालिटि हस्पिटल प्रालिले बिरामीलाई दिने सेवा सुबिधा लगायत बिशेषज्ञ सेवाका बारेमा अध्यक्ष दिपेन्द्र तिवारीको विचार प्रस्तुत गरिएको छ ।
अहिले हामीसँग भएका सुविधा मेडिसिन,अर्थोपेडिक,जनरलसर्जरी,युरोसर्जरी,न्यूरो सर्जरी,इएनटी,एनेष्टोलोजी लगायतका सुविधा रहेका छन् । हामीसँग रेडियोलोजी पनि छ । निकट भविष्यमा कार्डियो तिर नै जाने भनेर यो चलाएको हो । सुदूरपश्चिममा कार्डियोलोजी नभएका कारण कि काठमाडौँ कि भारत जानु पर्ने अवस्था छ, त्यही भएर हामीले यहाँ सञ्चालन गरेका हौँ ।
एक सय शैय्याको अनुमति नआउँदा सम्म त्यो प्रकृया अगाडि नबढ्ने रैछ । त्यो अनुमति आयो भने लगत्तै स्पेशल कार्डियोलोजी चलाउने योजनामा छौँ । यो सञ्चालन भयो भने हर्ट अट्याक आएको ६ घण्टाभित्र यहाँ आइपुगे बचाउन सकिने अवस्था हुन्छ । हर्टको बिरामीलाई बाहिर लैजान पनि समस्या हुन्छ । त्यसकारण कार्डियोलोजी चलाउने भन्ने योजना हो ।
ट्रमाको पनि सञ्चालनको तयारी गरेका छौँ । हामी कहाँ सबै विशेषज्ञ चिकित्सक रहेका छन् । मुख्यतया कार्डियो र ट्रमालाई नै प्राथमितामा राखेका छौँ । टेष्ट ट्युव बेवीको पनि योजना बनाएका छौँ । त्यसका लागि पनि निःसन्तान भएकाहरुले कि भारत कि काठमाण्डौँ नै जानुपर्ने बाध्यता छ । यसका लागि हामीले ल्याबका लागि सेटअप पनि लगभग गरिसकेका छौँ ।
यो पनि सुरु हुन केही समय लाग्छ । बाहिरबाट डाक्टर यहाँ आउन नै मान्दैनन् । केही घटना हुने वित्तिकै हस्पिटलमा तोडफोड हुने घटना भइराखेका हुन्छन् । यस्ता घटनाले बाहिरको डाक्टर यहाँ आउन मान्दैनन् । यहाँका बाहिर जान खोज्छन् । यस्ता कुरालाई सरकारले पनि सहजिकरण गरिदिनु पर्ने हो ।
काम गर्दा जानीजानी कसैले पनि गल्ती गर्दैन् । काम गर्दा त्यस्ता भवितव्य घटना घटि हाल्छन् । जनता आएर हस्पिटलमा तोडफोड गरिहाल्ने अवस्थाले यहाँ अलि गाह्रो भएको हो । यस्ता घटनामा सञ्चार माध्यमले पनि दुबै पक्षका कुरा राखेर सत्यतथ्य समाचार सम्प्रेषण गरिदिए सहज हुन्छ ।
हामीले यो अस्पताल एक सय बेडमा गएपछि गाउँटोलमा गएर प्रचारप्रसार गर्ने जनचेतना फैलाउने काम गर्छौँ । शिविर सञ्चालन गर्ने योजनामा छौँ । अहिले पनि हामीले १० प्रतिशत बेड गरिब जनताका लागि छुट्याएर राखेका छौँ ।
पन्ध्र बेडमा तीन बेड निःशुल्क नै छ । त्यसमा हामी बेड चार्ज पनि लिदैनौँ । नेपाल सरकारले तोके बमोजिमको कागजपत्र भने चाहिन्छ । औषधी किन्न नसक्ने बिरामी पनि आउनु हुन्छ उहाँहरुलाई निःशुल्क उपचार पनि गरेका छौँ । बिरामीको चाप पनि छ । हामीले गर्ने सेवामा हामी सन्तुष्ट छौँ । हामी कहाँ आएका बिरामी इन्फेक्सन भएर गएका छैनन् । जसले भोलि इन्फेक्सन नहोस भनेर बुझेको छ उसले हामी कहाँ नै आएर उपचार गराउने भइरहेको छ ।
हाम्रो यहाँ सबै ठाउँमा एसी नै चलेको छ । हाम्रो ल्याब पनि सी ग्रेडको छ । मेसिन पनि सबै राम्रै छन् । रिपोर्टिङ पनि राम्रै भइरहेको छ । २३ कठ्ठा जग्गामा हाम्रो हस्पिटल बनेको छ । हामीले बस्न स्वच्छ हावा लिनका लागि पार्क पनि बनाइ दिएका छौँ । अस्पतालको वातावरण पनि राम्रो छ ।
