वि.सं. २०७५ सालमा स्थापना भएको खप्तड मालिका यातायात प्राइभेट लिमिटेडको दोस्रो साधारणसभा बुधबार धनगढीमा भयो । सो दोस्रो साधारणसभाले दिलबहादुर खोलाउलाको अध्यक्षतामा सात सदस्यीय नयाँ कार्य समिति चयन गरेको छ । पछिल्लो पटक यातायात व्यवसायी संघले भोग्नु परेका समस्या र समाधानका उपायका बारेमा केन्द्रित रहेर अध्यक्ष खोलाउलासँग निशाना न्युजले गरेको कुराकानीका सारसंक्षेप यहाँ प्रस्तुत गरिएको छ :

१) खप्तड मालिका यातायात प्रालि दर्ता गर्नुको कारण के हो ?
खप्तड मालिका यातायात प्रालि सिन्डिकेटका विरुद्धमा जन्मेको संस्था हो । गाडीको रुट प्रमिट लिदा होस् अथवा सदस्यता शुल्क लिदा होस् महंगो शुल्क तिर्नुपर्ने अवस्थाको अन्त्य गर्न यो प्रालि दर्ता भएको हो । अन्य यातायात प्रालिमा मनमानी थियो । खुला अर्थतन्त्रमा सिण्डिकेट लागू गर्नु हुँदैन । व्यवसायीले सहज रुपले रुट प्रमिट पाउनु पर्ने हो । तर पाएनन् । जसका कारणले यो संस्था खोल्नु परेको हो ।

२) खप्तड मालिका यातायात र अन्य यातायात व्यवसायी संघमा भिन्नता के छ ?
यात्रुलाई राम्रो र गुणस्तरीय सेवा प्रदान गर्ने हाम्रो पहिलो उद्देश्य हो । यस प्रालिमा ४८ जना शेयर सदस्य रहेका छन् । यस प्रालिमा रुट प्रमिट अन्यको भन्दा सहज छ । सञ्चालक समितिको निर्णयबाट गाडी थप्ने, कर्मचारी राख्ने र समयानुकुल सेवालाई आधुनिकीकरण गर्दै लैजाने हाम्रो सोच छ ।

३) यातायात व्यवसायीका समस्या के देख्नुभएको छ ?
यातायात व्यवसायमा समस्याहरु धेरै छन् । यातायात व्यवसायीलाई राज्यले हेर्ने दृष्टिकोण फरक छ । समस्या समाधान गर्नुको साटो विभिन्न नाममा कर मात्र उठाउने काम भइरहेको छ । अहिले सरकारले रुट परमिट, जाँचपास, ब्लुबुक नबिकरण अनलाइन मार्फत गर्दै आएको छ । यसबारे सबैलाई जानकारी छैन् । जानकारी नहुँदा जरिवाना तिर्नुपर्ने अवस्था छ । बस मालिका र ड्राइभर एउटै मान्छे हुन्छ । गाडी लिएर कोही पहाड हुन्छन् । अनलाइन बारे जानकारी नहुँदा जरिवाना तिर्नुपर्ने उसलाई बाध्यता छ । राज्यसंग आफ्ना हकहितका बारेमा बहस गर्न सक्ने यातायात व्यवसायीमा गतिलो नेतृत्व छैन् ।

४) समस्या धेरै छन् भन्नुभयो, ती समस्या समाधानका लागि कसरी अघि बढ्ने सोच छ ?
यो व्यवसायमा म मात्र भन्ने प्रबृत्ति छ । राज्यलाई सबैभन्दा बढी कर तिर्ने क्षेत्र भनेको नै यातायात व्यवसायह हो । बन्द हड्ताल नगरी मागको सुनुवाई नहुने प्रबृत्ति हाम्रो देशमा छ । यातायात व्यवसायीका समस्या समाधान गर्न पहिला त राज्य नै जिम्मेवार हुनुपर्छ । अनि, सबै यातायात व्यवसायीहरु एक ठाउँमा उभिन जरुरी छ । पछिल्लो पटक यो व्यवसाय धरापमा पर्दै गएको छ । आफ्ना माग सम्बोधन गर्न सबै यातायात व्यवसायी एक ठाउँ उभिन सकेनन् भने चार/पाँच वर्षमा सडकमा पुग्न बेर लाग्दैन् ।

५) दुर्घटना पनि बढ्दै गएका छन् यसको न्यूनिकरणमा के पहल गर्नु हुन्छ ?
म यसमा राज्यलाई नै दोषि देख्छु । अहिले तीन तहका सरकार छन् । सडकको अवस्था हेर्दा पूरानै अवस्थाका छन् । साँघुरा छन् । खाल्डाखुल्डी छन् । सडक फाराकिलो छैनन् । सवारी संख्या दिनानुदिन बढ्दै गएको अवस्था छ । सडक सुधारको कुरामा राज्यको ध्यान जान सकेको छैन् । सडक स्त्तरोन्नतिका लागि बर्षौअघिका ठेक्का अलपत्र छन् । मापदण्ड नतोकिकन सवारी साधनलाई रुट परमिट दिने काम भइरहेको छ । कुन रुटमा कुन सवारी साधनलाई रुटपरमिट दिने हो भन्ने कुरा त राज्यको दायित्व हो नि । यातायात कम्पनी ऐन अनुसार सरकारले कानुन बनाउन सकेको छैन् ।
तर पनि हामीले दुर्घटना न्यूनिकरणका लागि ट्राफिक प्रहरीसँग मिलेर सचेतना फैलाउने काम गर्ने नै छौ ।

६) अन्त्यमा, राज्यसंग तपाईको अपेंक्षा के छ ?
कानुन नीति बनाउनु पर्यो । यातायातलाई अर्धसरकारी बनाउने, स्वमित्व ग्रहण गरिदिने हो भने धेरै समस्या समाधान भएर जान सक्छन् । सरकार जिम्मेवार रुपमा प्रस्तुत हुन जरुरी छ । सरकारले समस्या पहिचान गरी समाधानतिर लाग्नु पर्छ । सरकार भनेको अभिभावक हो । त्यो जिम्मेवारी बहन सरकारले गर्नुपर्छ ।