धनगढी- परराष्ट्रमन्त्री आरजु राणा देउवाले स्थिर सरकारका लागि नेपाली कांग्रेस र नेकपा एमालेको गठबन्धन बनेको बताएकी छन् । आज प्रेस युनियनले धनगढीमा आयोजना गरेको पत्रकार सम्मेलनमा बोल्दै उनले यस्तो बताएकी हुन् ।
‘सरकार अस्थिर हुँदा विकासले गति लिन सकेन् । जनताका समृद्धिको चाहाना पूरा हुन सकेनन् । धेरै युवा विदेश पलायन भए’, उनले भनिन् ‘यो सबै कुरालाई मध्यनजर गर्दै साच्चिकै विकासको लक्ष्यमा पुग्न सक्ने लामो समय चल्ने सरकारको परिकल्पना गरेर यो गठबन्धन बनेको हो ।’
उनले भनिन् ‘यो सरकाले सुशासन कायम गरेर विकास र समृद्धि ल्याउनेमा हामी आशावादी छौँ । हामी एकदमै गम्भीर भएर सरकार बनाउन दुईटा ठूला दल सँगै आएका हौँँ । यो सरकार २०८४ सम्मै जान्छ ।’
त्यस्तै मन्त्री राणाले अहिलेको सरकारको एउटा उद्देश्य संविधानको संशोधन पनि भएको बताइन् । उनले भनिन् ‘संविधानको मूलभूत सिद्धान्त भने परिवर्तन हुँदैन् ।’ ।
प्रधानमन्त्री केपी शर्मा ओलीले महिलालाई प्रधानमन्त्री बनाउन चाहन्छु भनेको र धेरैले तपाईं बन्नुहुन्छ भनेर अनुमान गरेका छन् नी ? भनेर पत्रकारले सोधेको जिज्ञासामा उनले भनिन् ‘हाम्रो पार्टी अनुसानमा चल्ने पार्टी हो । हाम्रो पार्टीभित्र धेरै जना प्रधानमन्त्री बन्न योग्य हुनुहुन्छ । बाहिर मेरोबारे जेजस्तो भए पनि पार्टीभित्र मेरो हैसियत के छ भन्नेबारे म जानकार छु । प्रधानमन्त्रीज्यूले आफ्नै पार्टीका महिलालाई प्रधानमन्त्री बनाउने कुरा गर्नुभाको होला ।’
परराष्ट्रमन्त्री बनेको छोटो समयमै नेपाललाई सबै देशले सहयोग गर्न चाहेको कुरा आफूलाई लागेको मन्त्री राणाको भनाइ थियो ।
