धनगढी- नेपाल समाजवादी पार्टी नेपालका अध्यक्ष तथा पूर्व प्रधानमन्त्री बाबुराम भट्टराइले चुनावपछि पनि गठबन्धनकै सरकार बन्ने दाबी गरेका छन् । पार्टीको प्रदेश स्तरीय प्रशिक्षणका लागि धनगढी पुगेका भट्टराइले सोमबार पत्रकार सम्मेलनमा सत्ता गठबन्धननै चुनावमा जाने र चुनावपछि गठबन्धनकै सरकार बन्ने बताएका हुन् ।

भट्टराइले तत्काल एमालेलगायतका दलहरुसंग सहकार्य सम्भव नरहेको बताए । संविधानको नेतृत्व गर्ने बर्तमान गठबन्धनकै दल भएका कारण जोगाउने दायित्व पनि यिनै दलको हुने उनको भनाई थियो । भट्टराइले यो व्यवस्था परिवर्तन गर्नका लागि दुई तिहाई बहुमत आवश्यक रहेको बताए । प्रत्यक्ष कार्यकारी राष्टपति र समानुपातिक सांसद प्रणालीका लागि संविधाननै संशोधन गर्नुपर्ने भएकाले त्यो अवस्था नआउँदासम्म गठबन्धनबाटै जानुपर्ने उनको भनाई छ ।

सिट बाँडफाँडका कारण गठबन्धनमा कुनै समस्या नआउने प्रस्ट पारेका छन् । धेरै दल भएका कारण गठबन्धनमा सिट बाँडफाँड गर्न ढिलाई भएपनि समस्या नआउने उनले बताए । सत्ता गठबन्धनमा धेरै दल भएका कारण आ-आफ्नो दावी रहँदा समयमै सिट बाँडफाँड हुन नसकेपनि अन्तमा सबैको सहमतीमै बाँडफाँड हुने भट्टराइको भनाई छ । अहिलेको गठबन्धन प्रतिगमनकारीका बिरुद्ध भएका कारण मिलेर जानुको बिकल्प नरहेको भट्टराइले बताएका हुन् । निर्वाचनमा एक्लै लडे कसैको पनि बहुमत आउन सक्ने नभएका कारण गठबन्धन गरेर निर्वाचनमा जानु परेको उनले बताए ।

२०७४ मा जितेका आ-आफ्नो ठाउँ लिने र बिपक्षीले जितेका ठाउँमा मात्रै सिट मिलाउनु परेको उनले बताए । साथै भट्टराइले नेपालका दुई दल कांग्रेस र एमालेबाहेकको समाजवादी पार्टी आवश्यक रहेको बताए । बैकल्पिक रुपमा समाजवादी पार्टी आवश्यक भएका कारण तालमेल र एकताबारे माओवादी, नेकपा समाजवादीलगायतका दलहरुसंग छलफल पनि चलिरहेको उनले बताए ।