धनगढी – नेपाली कांग्रेस सुदूरपश्चिम प्रदेश समितिको आयोजनामा दुई दिने प्रशिक्षण कार्यक्रम हुने भएको छ । प्रदेशस्तरी प्रशिक्षण कार्यक्रम यही भदौ २८ र २९ गते धनगढीमा हुने भएको हो ।
नेपाली कांग्रेस प्रदेश समितिले आज धनगढीमा पत्रकार सम्मेलन गर्दै कार्यक्रमको सम्पूर्ण तयारी पूरा भएको जनाएको छ । देशको बदलिदो अवस्थालाई लिड गर्दै आफ्ना कार्यकर्तालाई शैद्धान्तिक र कार्यक्रमको पक्षमा दक्ष,सबल र सक्षम बनाउन प्रशिक्षण कार्यक्रम गर्न लागिएको नेपाली कांग्रेस प्रदेश समितिका सभापति एवं प्रतिनिधि सभा सदस्य बीरबहादुर बलायरले बताए ।
उनले प्रशिक्षणमा कांग्रेसले केन्द्रमा गरेका निर्णयहरु जानकारी गराइने बताउँदै आफ्नो पदीय जिम्मेवार पूरा गर्न अवलम्बन्न गर्नुपर्ने कुरा,विपक्षीसँगको प्रतिस्पर्धाका लागि शैद्धान्तिक निपूर्णता दिलाउनका लागि प्रशिक्षण आयोजना गरिएको बताए ।
उनले भने ‘पछिल्लो समय नेपाली राजनीतिमा जुन किसिमको जनतालाई वितृष्णा मात्रै बोकाउने प्रवृति आएको छ । जिम्मेवारी बोध नहुने,नगर्ने,उत्तेजना फैलाउने प्रचलन नेपाली राजनीतिमा छिरेको छ । त्यसलाई चिर्नका लागि प्रशिक्षण आयोजना गरेका हौँ ।’
सुदूरपश्चिम सरकार कांग्रेस नेतृत्वको भएकाले सरकारले गरेका राम्रा गतिविधि जनतामा सुसुचित गर्ने गरि लैजाने समेत उनले बताए ।
प्रशिक्षण कार्यक्रममा प्रदेश,जिल्ला,क्षेत्र तथा स्थानीय स्तरका नेता कार्यकर्ता गरि ३ सय ५० जनाको सहभागिता रहने जनाइएको छ । प्रशिक्षण कार्यक्रमको उद्घाटनमा नेपाली कांग्रेसका सभापति शेरबहादुर देउवा आउने आयोजकले जनाएको छ ।
