कैलाली उद्योग वाणिज्य संघले धनगढीमा यही मङ्सिर २२ गतेदेखि पुस २ गतेसम्म ‘सुदूरपश्चिम महोत्सव आयोजना गर्दैछ । संघले विसं.२०६३ सालदेखि महोत्सव आयोजना गर्दै आएको छ । यो महोत्सवको १८ औँ संस्करण हो । महोत्सव नजिकिएको छ । महोत्सवको तयारीलगायतका बिषयमा संघका महासचिव ओमबहादुर बिष्टसँग निशाना न्युजले गरिएको कुराकानी प्रस्तुत गरिएको छ ।

महोत्सवको तयारी कस्तो छ ?
महोत्सवको तयारी तीब्र रुपमा भइरहेको छ । लगभग ८० प्रतिशत तयारी पूरा भएको छ ।

यस पटक दर्शकलाई आकर्षित गर्ने नयाँ चीज केही छन् ?
सुदूरपश्चिम महोत्सव आफैमा एउटा ब्रान्ड भइसकेको छ । यो महोत्सव एउटा पर्वको रुपमा पनि स्थापित भइसकेको कारणले पनि दर्शकहरु यो महोत्सव कहिले आउँछ भन्ने प्रतिक्षामा हुन्छन् ।

फेरि पनि हामीले प्रत्येक वर्ष केही नयाँ कुरा दिने गरेका छौँ । यद्यपि प्रतिकुल समयका बीच पनि हामीले त्यो कोसिस गरेका छौँ । दर्शकलाई सन्तुष्ट नै पार्ने काम गरेका छौँ । यो वर्ष आउटलेट पनि फरक किसिमको छ र बालउद्यानका सन्दर्भमा पनि नयाँ चिज यहाँहरुले भेटाउनु हुन्छ ।

बिगतदेखि सरकारसँग विभिन्न माग गर्दै आउनुभएको छ । यस पटक सरकारसँग यहाँहरुका माग के छन् ?
विगतमा भएको २१ बुँदे मागलाई नै निरन्तरता दिएका छौँ । पाँच वटा मागहरु पूरा भइसकेका छन् । छ वटा मागहरु सञ्चालनमा रहेका छन् । १० वटा मागहरु अझ पनि सम्बोधन हुन बाँकी छन् ।
ती दश वटा माग मध्य एउटा मागलाई हामी अलिकति परिमार्जित गरेका छौँ । एउटा इकोनोमिक जोन सेजको अवधारणा थियो । अहिले आएर प्राविधिक रुपमा हेर्दा सेज भनेको उत्पादित वस्तुको ६० प्रतिशत निर्यात गर्नुपर्ने भन्ने कुरा उल्लेख भएको कारणले गर्दाखेरी अन्तराष्ट्रिय बजारसँग प्रतिष्पर्धा गर्ने उद्योग यहाँ स्थापना गर्न नसकिने भएकाले सेजलाई हटाएका छौँ । सेजलाई हटाएर गेटामा भौतिक संरचना तयार भइसकेको फङ्सनमा नआएको जुन गेटा मेडिकल विश्वविद्यालय छ त्यसलाई यथासिघ्र सञ्चालन गर्नुपर्छ भन्ने माग थपेका छौँ ।

कार्यक्रम उद्घाटनमा सरकार प्रमुख आउनुहुन्छ ?
हाम्रो बिगतको परम्परा त्यही छ । सरकार प्रमुखलाई नै उद्घाटनका लागि निमन्त्रणा दिने गर्छौँ । यसपाली पनि प्रधानमन्त्रीलाई निमन्त्रणा दिएका छौँ । उहाँ चिन भ्रमण जाने भएकाले २० गते भित्र फर्के आफै आउँछु भन्नुभएको छ । उहाँ नआउने भएपछि हामीलाई तीन चारदिन पहिले जानकारी आउँछ । त्यो आधारमा हामीले तयारी गर्छौँ ।

बिगतका दिनमा स्थानीय कलाकारले स्टेज पाएनन् भन्ने गुनासा आउने गरेका थिए । यसपटक स्थानीय कलाकारको उपस्थिति कस्तो रहन्छ ?
गुनासा सबैका छन् । नभएका होइनन् । संघले १५ दिन महोत्सव गर्ने १५ दिनमा कति कलाकारलाई स्टेज दिन सकिन्छ । निरन्तर रुपमा हामीले नयाँ कलाकारलाई स्टेज दिइरहेका छौँ । स्टेज पाएका कलाकार सन्तुष्ट भएर जान्छन्,केही बाध्यताले समय अभावले स्टेज नपाएका कलाकारका गुनासा छन् भने उहाँहरुले एकछिन मनन् गरेर हाम्रो ठाउँमा उहाँहरुलाई राखेर गुनासाहरु गरिदिएको खण्डमा हामी त्यसमा सन्तुष्ट हुन्थ्यौँ ।

स्थानीय उत्पादनलाई कत्तिको प्राथमिकता दिनुभएको छ ?
यहाँहरुको जिल्लामा घरेलु उत्पादनसँग सम्बन्धित जति पनि उद्योग छन् ती उद्योगहरुलाई सुदूरपश्चिम महोत्सवमा सहभागी गराउन लिस्ट पठाउनुस भनेर हामीले ९ वटै जिल्लामा एक महिना अगाडि नै पत्राचार गरिसकेका थियौँ ।
उद्योग वाणिज्य संघहरुबाट छनोट गर्नु अगाडि नै केही उद्योगहरु सुदूरपश्चिम प्रदेश उद्योग निर्देशनालयले आफ्नो जिम्मा लिइसक्यो र २५÷३० वटा उद्योग स्टल त्यो भित्र राख्ने उहाँले तयारी गर्नुभएको छ । त्यो बाट छुटेका स्वस्फुर्त रुपमा उद्यमीहरुले स्टल बुक गरिसकेका छन् ।

आम दर्शकलाई यहाँको सन्देश छ ?
बिषम परिस्थिति छ । सुस्त गतिमा अर्थतन्त्र चलायमान छ । व्यापार व्यवसाय छैन् । त्यसलाई चलाएमान बनाउनको लागि दर्शकहरुको सहभागिता हाम्रो लागि सबैभन्दा ठूलो उपलब्धी ठानेका छौँ । प्रतिकुल परिस्थितिमा पनि हामीले कमसेकम निजी क्षेत्र,उद्योगधन्दा,कलकारखना अलिकत सञ्चालन गरेर यसलाई अर्थतन्त्रलाई चलायमान बनाउने कोशिस गरेका छौँ भन्ने दर्शाउन खोजेका छौँ ।

अन्त्यमा केही भन्नु हुन्छ ?
कैलाली उद्योग बाणिज्य संघले २०६३ सालदेखि सुदूरपश्चिम महोत्सव आयोजना गर्दै समग्र सुदूरपश्चिम भित्र भएका सम्भावनालाई उजागर गर्ने जुन कोशिस गरेको थियो त्यसलाई नै निरन्तरता दिएका छौँ ।