यहि पौष ९ गतेदेखि १५ गतेसम्म धनगढीमा नवौ वृहत राष्ट्रिय पुस्तक प्रदर्शनी तथा शैक्षिक महोत्सव २०८१ हुँदैछ । धनगढीमा हुन गईरहेको महोत्सवको तयारी लगायत विविध विषयमा आयोजक नेपाल पुस्तक तथा स्टेशनरी व्यवसायी संघ कैलालीका अध्यक्ष भीम पडालसंग निशाना न्युजले गरेको कुराकानी प्रस्तुत गरिएको छ ।

शैक्षिक महोत्सव गर्नुको उदेश्य के हो ?

नवौं वृहत राष्ट्रिय पुस्तक प्रदर्शनी तथा शैक्षिक महोत्सव कैलाली जिल्लाले दोस्रो पटक आयोजना गर्दैछ । १४ वर्ष अगाडि आयोजना भएको थियो । यसको मूख्य उदेश्य भनेको देशभरीका प्रकाशकहरुलाई एउटै ठाउँमा बोलाएर उहाँहरुले प्रकाशन गर्नुभएका सम्पूर्ण पाठ्यपुस्तक,सामग्रीहरु,विभिन्न विधाका पुस्तकहरु एकै ठाउँमा प्राप्त गर्न सकिने अवसरका रुपमा लिएका छौँ । अर्को शैक्षिक बहसकारुपमा पनि अगाडि बढाएका छौँ ।

शिक्षा क्षेत्र पालिका स्तरमा छ । संघीय संरचनामा गइसकेपछि शिक्षा पालिकामा गइसकेपछि त्यसको कठिनाइ,प्रगति,भविष्यमा पालिकाको योजना के छ यसका बारेमा पनि एउटा बहस रहन्छ । पठनपाठनको संस्कृति दिनानुदिन कमजोर हुँदै गइरहेको अवस्था छ । कसरी उजागर गर्न,बढाउन सकिन्छ यसका बारेमा पनि प्यानल डिस्कसन रहन्छ । प्रकाशकको समस्याका बारेमा जो ५०÷६० वर्ष अगाडि पुस्तक प्रकाशन हुन्थ्ये त्यो समयमा प्रकाशन गर्दा र आज कत्तिको सहज छ । भविष्यमा पुस्तक प्रकाशन गर्न कत्तिको सहज र समस्या हुन्छ त्यसका बिषयमा पनि छलफल हुन्छ ।

महोत्सवको तयारी के कस्तो छ ?

शैक्षिक महोत्सव जहाँ अहिले कैलाली उद्योग वाणिज्य संघले महोत्सवको आयोजना गरिहेको छ त्यही स्थलमा आयोजना गर्छौ । तयारी लगभग अन्त तिर पुगेको छ । स्टल बुकिङको काम लगभग सकिएको छ । भोलिसम्ममा सबै स्टलको काम सकिन्छ । मञ्चमा आवश्यक पर्ने सामग्रीको काम पनि तीब्ररुपमा अगाडि बढेको छ ।

पालिका व्यवसायिक संघ,महासंघ,वितरक,प्रकाशक संघमा निमन्त्रणा दिने काम भइरहेको छ । कलाकार बोलाउनेदेखि लिएर बच्चालाई रमाइलोका लागि बगैचा बनाउने सबै तयारी अन्तिम तिर छ । लगभग ८० प्रतिशत तयारी भइसकेको छ ।

महोत्सवबाट विद्यार्थीहरु कत्तिको प्रभावित हुन्छन् ?

पठनपाठनको संस्कृति दिनानुदिन लोप हुँदै गएको छ । हामी प्यानल डिस्कसनका रुपमा के गरेका छौँ भने कुन दिन कुन स्कुलको पालो पर्छ एक दिनमा ८/१० वटा स्कुलको उपस्थिति संगसँगै त्यो स्कुलको प्रिन्सिपल,व्यवस्थापन समितिको अध्यक्ष उपस्थिति अनिवार्य भनेका छौँ ।

प्यानल डिस्कसनमा एक पालिका विद्यार्थी अर्को पालिकाको बारेमा तथा प्रदेश सरकारले शिक्षामा गरिरहेको कामका बारेमा पनि जानकार हुन्छन् । हिजो र आजका बारेमा पनि जानकार हुन्छन् । पठन पाठन संस्कृति कसरी विकास गर्न सकिन्छ भन्ने बारेमा पनि केही विद्धत व्यत्तिहरुले आफ्ना तर्कहरु राख्नुहुन्छ । ८ कक्षा देखि माथिका विद्यार्थी यसमा सहभागी हुने भएकाले उहाँहरुले केही कुरा बझ्नुहुन्छ शिक्षालाई व्यवस्थित रुपमा लैजानका निमित्त यो शैक्षिक महोत्सवले उद्धत गर्छ जस्तो मलाइ लाग्छ ।

यसको मुख्य आकर्षण के हो ?
यसको मुख्य आकर्षण केहो भने देश भरीका प्रकाशकहरुले प्रकाशन गर्नुभएका विधि विधाका पुस्तकहरु प्रदर्शनी एउटा आकर्षण हो । यसलाई शैक्षिक गतिविधिका रुपमा सुदूरपश्चिमसँग आवद्ध भएर काम गर्ने पालिकाहरु जसले शिक्षाको बागडोर सम्हालेका छन् । शिक्षा क्षेत्रमा गर्ने प्रगतिका निमित्त यो शैक्षिक महोत्सव केही न केही फलदायी हुन्छ भन्ने हामीले विश्वास लिएका छौँ ।

कस्ता कलाकारको प्रस्तुति रहन्छ ?

भड्किलो खालको कलाकार यो महोत्सवमा हुँदैनन् । समान्यतया शैक्षिक महोत्सवलाई सफल पार्नुपर्ने हुन्छ । त्यसका लागि सामान्यतया गायन,नृत्यका लागि भड्किलो नहुने कलाकार हामीले बोलाएका छौँ ।

महोत्सवको सुरुआत कसरी हुन्छ ?

पुस ९ गते विहान साढे नौ बजेबाट धनगढीको ट्राफिक चौराहाबाट महोत्सव स्थलसम्म प्रभातफेरी हुन्छ । विभिन्न स्कुल,संघ संस्थालाई बोलाएका छौँ । रानाथरुको झाँकी,पहाडी समुदायको पञ्चेबाजा सहित प्रभातफेरी निकाल्छौँ ।

कति स्टल बुकिङ भए ?
एक सय भन्दामाथि स्टलहरु रहन्छन् । पाठ्यपुस्तकसँग सम्बन्धित स्टलहरु रहन्छन् । प्रकाशकहरुका विभन्न विधाका कितावहरु,कम्प्युटरहरुको,स्मार्टबोर्डको,शिक्षासँग सम्बन्धित स्टलहरु रहन्छन् । काठमाण्डौँबाट केही कलेजहरु आउँदै छन् उहाँहरुको पनि रहन्छ । धनगढीका केही कलेजहरुको पनि रहन्छ ।

यहाँले विद्यार्थीलाई केही सन्देश दिन चाहानुहुन्छ ?
वास्तवमा यो ऐतिहासिक शैक्षिक महोत्सव हो । यो प्रदर्शनीमा तपाइले चाहेका पुस्तकहरु बजारमा नपाएका किताबहरु त्यहाँ पाउनुहुन्छ । त्योभन्दा बढी खोज्न चाहेका किताबका बारेमा जानकारी पाउनुहुन्छ र भविष्यमा त्यो प्राप्त गर्न सजिलो हुन्छ । शिक्षामा देखिएका गतिविधिका बारेमा,शैक्षिक स्तरलाई अगाडि बढाउनका निमित्त,गुणस्तर सुधार्नका निमित्त यो मेला महोत्सव बास्तवमा कोसेढुंगा सावित हुन्छ भन्ने विश्वास लिएका छौँ । आम सुदूरपश्चिमबासी अभिभावक,विद्यार्थी,राजनीतिककर्मी,शिक्षासँग आवद्ध विभिन्न संघसंगठनमा आवद्ध प्रमुख,प्रतिनिधिहरु,शिक्षासँग सरोकार राख्ने आम जनसमुदायहरु यो महोत्सवमा उपस्थित भएर अवलोकन गरेर सुनिदिएर सफल पारिदिन हार्दिक आमन्त्रण गर्दछौँ ।