सामाजिक दायित्व पूरा गर्ने उदेश्य सहित यही मंसिर १५ गतेबाट श्री निङ्गलाशैनी गुरूकुल संस्कृत विद्यापीठ धनगढी–१३ बाट ‘खान पुगोस्,दिन पुगोस्’ अभियान सुरु गरिएको छ । अभियान सुरु भएयता विभिन्न विद्यापीठका विद्यार्थीलाई न्यानो कपडा वितरणसंगै ,समाजका गरिब मानिसलाई कम्मल लगायतका सामाग्री वितरण गरेको छ । अभियानको सार्थकता,अवस्था गतिबिधिका बिषयमा संयोजक घनश्याम भट्टसंग निशाना न्युजले गरेको कुराकानी प्रस्तुत गरिएको छ ।
तपाईहरुले न्यानो कपडा वितरण गर्न सुरु गर्नुभएको छ । अहिले सम्म कति ठाउँहरुमा कस्ता मानिसलाई न्यानो कपडा वितरण गर्नुभयो ?
धनगढी क्षेत्रभित्र बस्ने विपन्न परिवारलाई न्यानो कपडा वितरण गर्ने अभियानको सुरुवात गर्दै जाँदा नागरिक समाज विभिन्न सम्मानित व्यक्ति ,पेशा व्यवसायमा लागिरहेका मानिस देश तथा विदेशमा बस्ने नेपाली दाजुभाइ र दिदीबहीनीहरूको स्वःस्फूर्त सहयोगमा हामीले अहिलेसम्म विपन्न तथा आश्रित नागरिकलाई ३१ वटा कम्मल र विभिन्न विद्यालयका ४ सय १६ विद्यार्थीलाई न्यानो लुगा वितरण गरि सकेका छौँ । यो अभियान सबैको साथ सहयोगमा निरन्तर जारी रहने छ । यो हाल धनगढी उपमहानगरपालिका क्षेत्रभित्र मात्रै सञ्चालन भै रहेको अभियान हो ।
न्यानो कपडा वितरण पश्चात तपाईहरुले समुदायका मानिसको कस्तो प्रतिक्रिया पाउनुभएको छ ?
अभियानको पहिलो सफलता भनेको ३५ वर्षदेखि आफ्नो परिवारबाट छुट्टिएर धनगढी–१३ मा कष्टकर जीवन विताइ रहेका भजन साउदको परिवारसँग पुनर्मिलन भएको छ ।
यो अभियानको पहिलो सफलताका रूपमा हामीले लिएका छौँ । साथै सामाजिक उत्तरदायित्व वहन गरेर संचालनमा रहेका विभिन्न संस्थाहरूले आफूहरूले न्यानो लुगा पाएपछि आफूलाई सहज भएको अभिव्यक्ति दिनुभएको छ । सांस्कृतिक विद्यापीठले यो अभियानले सभ्य,संस्कारी सहयोगी समाज निर्माणको यात्रा तय गरोस् भन्ने कामना व्यक्त गर्नुभएको छ ।
साथै विपन्न परिवारका बालबालिकालाई न्यानो लुगा पाएपछी विद्यालयमा अध्ययन गर्न सहज भएको छ । विद्यार्थीहरू नियमित रूपमा विद्यालय आइरहेको विद्यालय परिवारले हामीलाई जानकारी गराउनु भएको छ । साथै हाम्रो अभियानलाई नागरिक स्तरबाट उत्साह जनक रूपमा हामीले साथ,सहयोग, माया र आशीर्वाद पाइरहेका छौँ।
भविष्यमा यो अभियानले समाज रुपान्तरणमा कस्तो योगदान पु¥याउला केही सोच्नु भएको छ ?
यो अभियानलाई हामीले हामी नागरिकको समाज प्रति को दायित्व र कर्तव्य को रूपमा लिएका छौँ । समाजमा व्याप्त अराजकतालाई अन्त्य गरी सभ्य,संस्कारी र सहयोगी समाज निर्माणमा आम नागरिकको सहभागिताले सम्भव छ भन्ने हाम्रो बुझाइ छ ।
साथै २१ औँ सताव्दी को अत्याधुनिक युगमा विज्ञानसंग साक्षात्कार गराउँदै शिक्षासंगै संस्कार र संस्कृतिलाई जोडेर लान सकियो भने मात्रै सभ्य ,संस्कारी र सहयोगी समाज निर्माण सम्भव छ । हामी सबैले आफ्नो र अरूको पेशा, व्यावसायिक सीप, कला आदि सबैको उच्च हृदयका सम्मान गर्दै आफ्नो सामाजिक दायित्व निर्वाह गर्दै गयौँ भने सभ्य र समृद्ध राष्ट्र निर्माण सम्भव हुनेछ ।
यो अभियान गर्नुपर्छ भन्ने सोच कहाँबाट पलायो ?
आफ्नो देश नेपाल मैं आफ्नो सुन्दर भविष्य सम्भव छ । यही देश भित्र धेरै सम्भावनाहरू छन । यो देश मेरो शान हो , यो बीर गोर्खालीको देश हो ।
यो सीता र भृकुटीको जन्मभूमि हो । यो विश्वशान्तिका दूत गौतम वुद्धको जन्मभूमि हो । यो श्री पशुपतिनाथ, मुक्तिनाथ जस्ता अनेकौँ शक्तिपीठ भएको देव भूमि हो । यो देश विश्वको सर्वोच्च शिखर सगरमाथा भएको देश हो । यो विभिन्न जातजाति, भाषाभाषी,भिन्नभिन्न संस्कृति भएर पनि एउटै माला नेपाली भनेर पहिचान बोकेको देश हो ।
यो देश बनाउने दायित्व मेरो पनि हो र हरेक नेपाली नागरिकको पनि हो । यदी हामीले सकारात्मक सोच राखेर बिना आग्रही पूर्वाग्रही हातेमालो गरेर एकतावद्ध भएर सभ्य ,संस्कारी र सहयोगी समाज निर्माणको अभियानमा सबै आ–आफ्नो ठाउँबाट निःस्वार्थ रूपमा आफूले सकेको आर्थिक, भौतिक, वौद्धिक लगानी आवश्यक परेको ठाउँमा रचनात्मक रूपमा लगायाँै भने देश बन्न धेरै समय लाग्ने छैन । आजसम्म हाम्रो समाजमा नागरिक स्तरबाट दान , सहयोगबाट हामीले आज धेरै सार्वजनिक सम्पत्ति पाएका छौँ ।
जस्को निरन्तरता हाम्रो पुस्ताले पनी गर्नुपर्छ । त्यस्ता सामाजिक संघसंस्था हाम्रा वहुमूल्य सम्पत्ति हून । ती सबैको संरक्षण, संवद्र्र्धन,विकास र विस्तारमा सहभागी हुनु हाम्रो दायित्व हो भन्ने सोचका साथ हामीले यो ‘खान पुगोस्, दिन पुगोस्’ अभियान सुरुवात गरेका हौँ ।
अन्तमा समग्र धनगढी बासीलाई केही सन्देश दिन चाहानुहुन्छ ?
हाम्रो देशमा धेरै सम्भावनाहरू छन त्यत्तिकै चुनौतिहरू पनि छन । हाम्रो समाजमा एक अर्का पति सहयोग सद्भाव कÞायम गराउँदै समाजमा व्याप्त विभिन्न समस्या सामाधानका लागि एकतावद्ध भएर हातेमालो गरेर अगाडि बढ्न हामीले ढिलो गर्नुहुँदैन् ।
शिक्षा,स्वास्थ्य,कृषि र संस्कृति बलियो राष्ट्र निर्माणको प्रमुख आधार हो । हाम्रो अभियान प्रति सकारात्मक सोच राखी हाम्रो अभियानलाई निरन्तर साथ सहयोग गर्ने सम्पूर्ण संचारकर्मी साथीहरूलाई हृदय देखि आभार प्रकट गर्दछौँ ।
