अछाम- राष्ट्रपति शैक्षिक सुधार कार्यक्रमअन्तर्गत अछामका ६३ विद्यालय छनोटमा परेका छन्। चालू आर्थिक वर्ष २०७९/८० का लागि ३९ विद्यालयमा भवन निर्माण र २४ विद्यालय सूचना प्रविधिअन्तर्गत छनोटमा परेका छन्।
अछामका दस स्थानीय तहमध्येमा रामारोशन गाउँपालिकामा ११ भवन निर्माण र दुईवटा सूचना प्रविधि गरेर १३ विद्यालय छनोटमा परेका छन्। कमलबजार, साँफेबगर नगरपालिका, मेल्लेख, चौरपाटी, बान्नीगढी जयगढ गाउँपालिकामा चार, चार विद्यालय छनोटमा परेका छन्। पञ्चदेवल विनायक नगरपालिकाका तीन, तीन विद्यालय, ढकारी गाउँपालिका र मङ्गलसेन नगरपालिकाका सात, सात, तुर्माखाँद गाउँपालिकाका छ विद्यालय छनोटमा परेका छन्।
छनोटमा परेकामध्येका २८ विद्यालयले चारकोठे र ११ विद्यालयमा दुईकोठे भवन निर्माण हुनेछन्। जिल्लाका २४ विद्यालयमा सूचना प्रविधि स्थापना गरिनेछ। चारकोठे भवनका लागि ५० लाख, दुईकोठे भवनमा २५ लाख र सूचना प्रविधिमा छ लाख ५० हजार रुपियाँ यसै आर्थिक वर्षमा खर्च गर्नुपर्ने छ।
