पहाडको समाजलाई समेटेर जिजिकोट–सलेना समाज गठन गरीयो । त्यो समाज सामाजिक संगठन मात्रै भएको र आर्थिक उपलब्धि कुनै नभएको त्यही समाज द्धारा नै आर्थिक सामाजिक संगठनको सुरुवात गर्नुपर्छ भनेर  संजीवनी बचत तथा ऋण सहकारी संस्थाको गठन गरियो । २०६८ सालमा ७५ जना शेयर सदस्यबाट गठन गरिएको सो सहकारीको अहिलेको अबस्था लगायतका विषयमा धनगढी उपमहानगरपालिका–५ हसनपुरस्थित संस्थाका अध्यक्ष बलराम भट्ट संग निशाना न्युजले गरेको कुराकानी प्रस्तुत गरिएको छ ।

यसको स्थापना कहिले र कसरी भएको हो ?
यसको स्थापना २०६८ सालमा ७५ जना शेयर सदस्यबाट भएको थियो । यसले धनगढी उपमहानगरपालिका सम्पूर्ण वडामा आफ्नो कार्यविस्तार गरेको छ । यसको उदेश्य भनेको बैंकबाट प्रताडित भएका र बैंकमा जान नसक्ने मानिसका लागि सजिलै तरिकाले साह्रो गाह्रो टार्ने किसिमको आर्थिक सहयोग उपलब्ध गराउनुका साथै सामाजिक संगठन हो ।
त्यत्तिकै पैंसा नभएर पैसाको कारोबार नभएर सामाजिक कामका लागि मान्छेहरु जम्मा हुन गाह्रो हुने भएकाले आफ्नै एउटा निश्चित समाजका मान्छेहरुलाई आर्थिक सामाजिक सहयोग उपलब्ध होस् भन्ने अभिप्रायले यस संस्थाको स्थापना गरिएको हो ।
निश्चित समाज भन्नुभयो यो कस्तो हो ?
निश्चित समाज भन्नाले पहाडको समाजलाई समेटेका छौँ । पहाडमा जिजिकोट–सलेना समाज गठन गरेका थियौँ । त्यो समाज सामाजिक संगठन मात्रै भएको र आर्थिक उपलब्धि कुनै नभएको त्यही समाज द्धारा नै आर्थिक सामाजिक संगठनको सुरुवात गर्नुपर्छ भनेर हामीले त्यहीका मान्छे मिलेर यसको स्थापना गरेका हौँ । यो समाजभित्र पर्ने मान्छलाई शेयर दिने र त्यो समाजमा पढ्ने विद्यार्थी छन् उनीहरुलाई सस्तो दरमा ऋण दिन्छौँ ।
बचत कति छ कर्मचारी कति छन् ?
यसमा एकजना व्यवस्थापक छ । शेयर सदस्यलाई लगानी गर्ने गरेका छौँ र आफ्नै शेयर सदस्यबाट बचत गर्ने गरेका छौँ । विभिन्न किसिमका बचतहरु जम्मा गर्ने गर्दछौँ ।
पुँजी कति पुगेको छ ?
यसमा सुरुमा २२ लाख पुँजी थियो र अहिले बचत सबै लगाएर शेयर पुँजी ३२ लाख पुगेको छ । ऋण दिँदाखेरी अधिकतम ५ लाख दिन्छौँ । ऋण दिने प्रकृया भनेको हामी मालमा गएर जग्गा रोक्का गराउँछौँ र त्यसैका आधारमा ऋण दिन्छौँ । हामीसँग ऋण समिति पनि छ ।
ऋण लगानी कस्तो क्षेत्रमा गर्नुहुन्छ ?
व्यापारिक,शिक्षा,कृषि क्षेत्रमा ऋण दिने गरेका छौँ । शिक्षा र कृषि क्षेत्रमा सस्तोमा ऋण दिन्छौँ । व्यापारिक अलि महंगो छ । कृषि र शिक्षा क्षेत्रमा वार्षिक १२ प्रतिशतमा ऋण दिन्छौँ । अहिले हामीले ओभरसियर,एचए र डक्टर पढ्ने विद्यार्थीलाई लगानी गर्ने गरेका छौँ ।
असुली सन्तोषजनक छ ?
असुलीमा व्याजमा खासै समस्या देखिदैन् । साँवा अली कम जम्मा गर्ने गर्छन् भने अनुसार आइरहेको छैन् ।
सहकारी अगाडि बढाउने आगामी योजना के छन् ?
अन्य संस्थासँग समन्वय गरेर पुँजी बढाउने र लगानीको क्षेत्र तथा लगानीको सीमा पनि बढाउने योजना छ । अरु त्यस्तो थप योजना केही छैन् । बजारमा गएर अरुका पैंसा संकलन गरेर धेरै बढाउनुपर्छ भन्ने पक्षमा छैनौँ । सबभन्दा पहिला शेयर सदस्यको संख्या बढाउने र आफ्नो शेयर पुँजी बढाइसकेपछि त्यसलाई नै बढी मार्केटमा परिचालन गरेर जाने भन्ने हाम्रो योजना छ ।