धनगढी । कैलालीको गेटास्थित सहिद दशरथ चन्द स्वास्थ्य विज्ञान विश्वविद्यालयले आगामी शैक्षिक सत्रदेखि चिकित्सा शिक्षाको पठनपाठन सुरु गर्ने तयारी गरेको छ । यसका लागि विश्वविद्यालयले आवश्यक शैक्षिक जनशक्ति पदपूर्ति प्रक्रिया अघि बढाउनुका साथै चिकित्सा शिक्षा आयोगसँग अनुमति मागेको जनाएको छ ।
विश्वविद्यालयका रजिस्ट्रार डा। खेमराज जोशीका अनुसार एमबिबिएस, बिएस्सी नर्सिङ, बिएस्सी एमएलटी र बी अप्टोमेट्री कार्यक्रम सञ्चालन गर्ने तयारी भइरहेको छ । आवश्यक जनशक्ति व्यवस्थापनका लागि विश्वविद्यालयले करार सेवामा २६ जना प्राध्यापक र ५१ जना उपप्राध्यापक पदका लागि दरखास्त आह्वान गरिसकेको छ भने आगामी महिनादेखि छनोट प्रक्रिया सुरु गरिने बताइएको छ ।

हाल गेटामा सञ्चालनमा रहेको ५० शैयाको अस्पताललाई स्तरोन्नति गरी ३०० शैयाको शिक्षण अस्पताल बनाउने प्रस्ताव पनि अघि सारिएको छ । यसका लागि फिजियोलोजी, प्याथोलोजी, इएनटी, जनरल सर्जरी, एनेस्थेसियोलोजी, इन्टरनल मेडिसिन, अप्थाल्मोलोजी, मेडिकल एजुकेसन तथा फार्माकोलोजी लगायतका विषयमा जनशक्ति पदपूर्ति प्रक्रिया अघि बढाइएको छ ।
अस्पताल तथा शैक्षिक कार्यक्रम सञ्चालनका लागि विश्वविद्यालयले आगामी आर्थिक वर्षका लागि २ अर्ब ५८ करोड रुपैयाँ बजेट माग गरेको छ । उक्त प्रस्ताव प्रधानमन्त्री तथा मन्त्रिपरिषद् कार्यालय हुँदै अर्थ मन्त्रालयमा पुगेको जनाइएको छ ।
यसैबीच, सुदूरपश्चिमबाट निर्वाचित सांसदहरूले विश्वविद्यालय सञ्चालनको माग गर्दै प्रधानमन्त्री तथा अर्थमन्त्रीसँग छलफल गरेका छन् । गत साता भएको छलफलमा प्रधानमन्त्रीले गेटा विश्वविद्यालय सञ्चालनलाई प्राथमिकतामा राखेर अघि बढ्ने प्रतिबद्धता जनाएका छन् ।