टंक कुंवर
धनगढी । आर्थिक अभावले जीवन कठिन बनेको समय थियो, २०७५ सालतिर। चार जनाको परिवार पाल्न मुस्किल भइरहेका बेला राजेश चौधरी कामको खोजीमा भौतारिँदै थिए। एकातिर भारत वा साउदी अरब जाने सोच, अर्कोतिर आफ्नै देशमा केही गर्ने चाहना—यही द्विविधाबीच उनले अन्ततः स्वदेशमै केही गर्ने अठोट गरे।

साहसिक निर्णयसँगै उनले हिमशिखर सहकारी संस्थाबाट २ लाख रुपैयाँ ऋण जुटाए र धनगढीको वैयाबेहडीमा “निरुता चाउमिन उद्योग” स्थापना गरे। यही सहयोग र आफ्नै निरन्तर मेहनतका कारण आज उनको उद्योग सफलताको बाटोमा अघि बढिरहेको छ।

हाल उनको उद्योगबाट उत्पादन गरिएको चाउमिन दैनिक एक क्विन्टलसम्म बिक्री भइरहेको छ। प्रति केजी १०० रुपैयाँका दरले बिक्री हुने चाउमिनबाट दैनिक करिब १० हजार रुपैयाँ आम्दानी हुन्छ। सबै खर्च कटाएर मासिक ३० हजार रुपैयाँसम्म बचत हुने गरेको उनले बताए।
राजेश भन्छन्, “पहिलाको दिन सम्झँदा अझै मन दुख्छ। धेरै दिन त भोकै सुत्नुपर्थ्यो।

परिवार चलाउन निकै गाह्रो थियो।” विदेश जाने सोच त्यागेर स्वदेशमै केही गर्ने निर्णय नै आफ्नो जीवनको टर्निङ पोइन्ट बनेको उनी बताउँछन्।
हिमशिखर सहकारी संस्थाको साथ र सहयोगप्रति उनी कृतज्ञ छन्। “यदि सहकारीको सहयोग नपाएको भए यहाँसम्म पुग्न सक्ने थिइनँ,” उनले भने।

अहिले उनको आर्थिक अवस्था पहिलेभन्दा निकै सुधारिएको छ। छोरी कक्षा ७ मा र छोरा यूकेजीमा अध्ययनरत छन्। “अहिले आम्दानी राम्रै छ, आर्थिक अभावको महसुस नै हुँदैन,” उनी खुसी हुँदै भन्छन्।

हाल उद्योग भाडाको घरमा सञ्चालन भइरहेको भए पनि निकट भविष्यमा आफ्नै घरमा सार्ने योजना बनाएका छन्। आम्दानी बढ्दै जाँदा उनले धनगढी–८, मोतीचोकमा ८ धुर जग्गा समेत खरिद गरिसकेका छन् र केही वर्षभित्र घर निर्माण गर्ने लक्ष्य लिएका छन्।
राजेश चौधरीको कथा स्वदेशमै परिश्रम र दृढ इच्छाशक्तिले सफलता सम्भव छ भन्ने प्रेरणादायी उदाहरण हो।