धनगढी । धनगढी उपमहानगरपालिकाले कक्षा ११ र १२ मा अध्ययनरत विद्यार्थीका लागि प्रदान गर्दै आएको छात्रवृत्ति कार्यक्रमबाट पछिल्लो तीन वर्षमा ९१७ जना विद्यार्थी लाभान्वित भएका छन् ।
उपमहानगरपालिकाको शिक्षा, युवा तथा खेलकुद महाशाखाको तथ्याङ्कअनुसार छात्रवृत्ति प्राप्त गर्ने विद्यार्थीको संख्या वर्षेनी वृद्धि हुँदै गएको देखिएको छ । सार्वजनिक विवरणअनुसार आर्थिक वर्ष २०८१ मा २७६, २०८२ मा २८३ र २०८३ मा ३५८ जना विद्यार्थीले छात्रवृत्ति प्राप्त गरेका छन् ।
तीन वर्षको अवधिमा छात्रवृत्ति पाउने विद्यार्थीको संख्या ८२ ले बढेको छ । संकायगत रूपमा हेर्दा विज्ञान र व्यवस्थापन संकायमा छात्रवृत्ति प्राप्त गर्ने विद्यार्थीको संख्या अत्यधिक रहेको छ ।
तीन वर्षमा विज्ञान संकायका ४७५ जना तथा व्यवस्थापन संकायका ३४३ जना विद्यार्थी छात्रवृत्तिबाट लाभान्वित भएका छन् । यी दुई संकायमा मात्र कुल छात्रवृत्ति प्राप्तकर्तामध्ये करिब ८९ प्रतिशत विद्यार्थी समेटिएका छन् ।
त्यस्तै, होटल म्यानेजमेन्ट संकायमा पनि छात्रवृत्ति प्राप्त गर्ने विद्यार्थीको संख्या उल्लेख्य रूपमा बढेको छ । २०८१ मा ११ जना रहेको संख्या २०८३ मा २६ पुगेको छ । पर्यटन तथा आतिथ्य क्षेत्रप्रति बढ्दो आकर्षणका कारण यस संकायमा विद्यार्थीको रुचि बढ्दै गएको देखिन्छ ।
त्यसैगरी, कानून संकायमा तीन वर्षमा २७ जना विद्यार्थीले छात्रवृत्ति प्राप्त गरेका छन् । शिक्षा संकायमा १७ जना र मानविकी संकायमा जम्मा ३ जना विद्यार्थी मात्र छात्रवृत्तिबाट लाभान्वित भएका छन् ।
धनगढी उपमहानगरपालिकाले विपन्न, जेहेन्दार तथा लक्षित वर्गका विद्यार्थीलाई उच्च शिक्षामा पहुँच सुनिश्चित गर्ने उद्देश्यले छात्रवृत्ति कार्यक्रम सञ्चालन गर्दै आएको जनाएको छ । छात्रवृत्ति वितरणको बढ्दो दायराले आर्थिक रूपमा कमजोर परिवारका विद्यार्थीलाई शिक्षामा निरन्तरता दिन थप सहयोग पुगेको अपेक्षा गरिएको छ ।
