धनगढी । कैलाली भन्सार कार्यालय धनगढीले ७ अर्ब ७५ करोड २१ लाख राजस्व सङ्कलन गरेको छ । कार्यालयले चालु आर्थिक वर्ष २०८२/८३ को साउनदेखि जेठ मसान्तसम्मको ११ महिनाको अवधिमा उक्त परिमाणको राजस्व सङ्कलन गरेको हो ।
भन्सार कार्यालयका सूचना अधिकारी प्रकाश तिमिल्सिनाका अनुसार सो अवधिमा कार्यालयले भन्सार महसुलतर्फ २ अर्ब ६६ करोड दुई लाख,मूल्य अभिवृद्धि करतर्फ ३ अर्ब ३३ करोड ९६ लाख,अन्तःशुल्कतर्फ १३ करोड ८६ लाख र अन्यतर्फ १ अर्ब ६१ करोड ३७ लाख राजस्व सङ्कलन गरेको छ ।
कार्यालयले साउन महिनामा ५७ करोड ८० लाख, भदौमा ५३ करोड ७० लाख, असोजमा ६७ करोड ७८ लाख,कार्तिकमा ७२ करोड ५४ लाख र मङ्सिरमा ६८ करोड ९१ लाख राजस्व सङ्कलन गरेको उनले जानकारी दिए ।
त्यस्तै,उनका अनुसार पुस महिनामा ७४ करोड ६५ लाख,माघमा ६८ करोड ८२ लाख,फागुनमा ७६ करोड ४४ लाख,चैतमा ९२ करोड तीन लाख,वैशाखमा ७० करोड २२ लाख र जेठमा ७२ करोड २८ लाख राजस्व सङ्कलन भएको छ ।
कार्यालयले सो अवधिमा सङ्कलन गरेको राजस्व वार्षिक लक्ष्यको ७९ दशमलव ८२ प्रतिशत रहेको उनले जानकारी दिए । सूचना अधिकारी तिमिल्सिनाका अनुसार चालु आर्थिक वर्षमा नौ अर्ब ७१ करोड १५ लाख राजस्व सङ्कलन गर्ने कार्यालयको वार्षिक लक्ष्य रहेको छ ।
कार्यालयको गत आर्थिक वर्ष २०८१÷८२ मा ११ अर्ब १६ करोड २६ लाख राजस्व सङ्कलनको वार्षिक लक्ष्य रहेकामा आठ अर्ब ६६ करोड ९८ लाखमात्रै राजस्व सङ्कलन भएको सूचना अधिकारी तिमिल्सिनाले जानकारी दिए । जुन वार्षिक लक्ष्यको ७७ दशमलव ६७ प्रतिशतमात्रै रहेको भन्सार कार्यालयले जनाएको छ ।
