धनगढी। नियमित सरसफाइ, प्रभावकारी फोहोर व्यवस्थापन र जनसहभागिताका कारण धनगढी उपमहानगरपालिका सफा र व्यवस्थित बन्दै गएको छ ।

२०७९ को स्थानीय तह निर्वाचनमा स्वतन्त्र उम्मेदवार गोपाल हमाल नगर प्रमुखमा निर्वाचित भएपछि ‘हाम्रो धनगढी, सफा धनगढी’ अभियानलाई प्राथमिकतामा राखिएको थियो । अभियानअन्तर्गत हरेक टोल र समुदायस्तरमा सरसफाइ समिति गठन गरी नियमित सरसफाइ हुँदै आएको छ ।

यसका कारण धनगढी बजार क्षेत्रदेखि ग्रामीण क्षेत्र विगतको तुलनामा सफा, व्यवस्थित र आकर्षक देखिन थालेको छ । सार्वजनिक स्थल तथा मुख्य सडकहरूमा सरसफाइलाई निरन्तरता दिइएको उपमहानगरपालिकाले जनाएको छ ।

हालै देशका विभिन्न प्रमुख शहरको भ्रमणबाट फर्किएका एक स्थानीयले सरसफाइका दृष्टिले धनगढी अन्य शहरभन्दा उत्कृष्ट देखिएको बताएका छन् । उनका अनुसार धनगढी क्षेत्रको अवस्था अभियानको सकारात्मक उपलब्धि हो ।

उपमहानगरपालिकाले नगरलाई स्वच्छ, सुन्दर र व्यवस्थित बनाउने लक्ष्यसहित अभियानलाई निरन्तरता दिइरहेको छ । स्थानीयवासीको सहभागिता र नगरपालिकाको सक्रियताले धनगढीलाई सरसफाइको क्षेत्रमा उदाहरणीय शहरका रूपमा स्थापित गर्न टेवा पुगेको सरोकारवालाहरूको भनाइ छ ।

धनगढी–१ का शिवराज अवस्थीले सबैलाई अभियानमा सहभागी हुन आग्रह गर्दै भने, ‘यो हाम्रो आफ्नै अभियान हो, सरसफाइ मेरो जिम्मेवारी भन्ने भावना सबैमा हुनुपर्छ ।’

धनगढी उपमहानगरपालिकाका अनुसार अभियान सुरु भएदेखि हालसम्म हजारौँ नगरवासी सहभागी भइसकेका छन् । प्रत्येक वडामा साप्ताहिक रूपमा सरसफाइ कार्यक्रम सञ्चालन हुँदै आएको छ भने फोहोरमैला वर्गीकरणसम्बन्धी तालिम पनि स्थानीयलाई दिइँदै आएको धनगढी उपमहानगरपालिकाका सरसफाइ शाखा प्रमुख अशोक अवस्थीले जानकारी दिए ।

उनका अनुसार विद्यालय तथा टोलबस्तीमा सघन रूपमा अभियान सञ्चालन भइरहेको छ । ‘हरेक महिनामा प्रत्येक वडामा सरसफाइ सप्ताह मनाइन्छ,’ उनले भने, ‘वडा र टोलस्तरीय समिति गठन गरी अभियानलाई थप व्यवस्थित बनाइएको छ ।’