धनगढी । कैलालीको धनगढीस्थित संजीवनी अस्पताल प्रालिले आफ्नो चौथो वार्षिकोत्सव मनाएको छ ।
अस्पतालले बुधबार एक कार्यक्रमको आयोजना गर्दै आफ्नो चौथो वार्षिकउत्सव मनाएको हो।
कार्यक्रममा बोल्दै सीटीइभीटी सुदूरपश्चिम प्रदेश उपनिर्देशक दीपा जोशीले अस्पताल सञ्चालन गर्नु त्यति सजिलो नभएको बताउँदै अस्पताल नै अस्पताल भएको क्षेत्रमा संजीवनीले आफ्नो छुट्टै पहिचान बनाउन सफल भएको बताइन्।
उनले आगामी दिनमा पनि अस्पतालले सेवा विस्तार गर्दै लैजाने विश्वास व्यक्त गर्दै सुदूरपश्चिमका बिरामीको आशाको केन्द्र बन्ने विश्वास व्यक्त गरिन्।
कार्यक्रममा बोल्दै अस्पतालका अध्यक्ष दुष्यन्त बस्नेतले स्थापनाकालदेखि नै धेरै मेहनत र परिश्रम गरेर यहाँसम्म पुग्न सफल भएको बताए।
विभिन्न बाधा र अड्चनका बावजुद गरिएको अथक प्रयासले अस्पताल प्रदेशका बिरामीको भरोसाको केन्द्र बन्न पुगेको उनले बताए।
उनले अस्पतालले आपत्कालिन,प्रसूति,शल्यक्रिया र विभिन्न विशेषज्ञ सेवामार्फत यस क्षेत्रका बिरामीलाई सेवा दिने प्रयास गरिएको बताए ।
आगामी दिनमा थप सुविधासहित ५० शय्याको अस्पताल आफ्नै भवनमा बनाई यस क्षेत्रकै भरपर्दो स्वास्थ्य संस्थाका रुपमा विकास गरिने उनले बताए ।
अस्पतालका मेडिकल डाइरेक्टर डा.सुमन चौधरीले चार वर्षको यात्रा निकै नै संघर्ष र चुनौतीपूर्ण रहेको बताउँदै अस्पतालले सुलभ तथा गुणस्तरीय स्वास्थ्य सेवा दिँदै आएको बताए ।
उनले विभिन्न विशेषज्ञ सेवा, मेडिसिन, सर्जरी, गाइने, रेडियोलोजी, डेन्टल, न्युरो सर्जरी अर्थोपेडिक लगायतका सेवाहरु विस्तार गर्दै अस्पतालले स्वास्थ सेवा दिँदै आएको बताए ।
उनले अस्पतालमा इमर्जेन्सी तथा फार्मेसी सेवा पनि २४ घण्टा उपलब्ध रहेको बताए।
कार्यक्रममा अस्पतालमा उत्कृष्ट काम गरेबापत कर्मचारीहरूलाई सम्मान पनि गरिएको थियो।
