काठमाडौं- कतार विश्वकप फुटबल-२०२२ को एक महिने काउन्टडाउन शुरू भएको छ ।विश्वकप प्रतियोगिताको एक महिने काउन्टडाउन शुरू भएको अवसरमा कतारी राजदुतावास काठमाडौंले शुभकामना आदान-प्रदान कार्यक्रम गरेको छ ।काउन्टडाउन शुरू भएको उपलक्ष्यमा आयोजित कार्यक्रममा लक्की ड्र मार्फत फुटबल विजेता चयन गरिएको थियो ।
फुटबल विजेताहरूमा रमेश व्यञ्जनकार, प्रियन्का भण्डारी, प्रकास बावु थापा, शैलेन्द्र वजाचार्य, काजोल झा, तुलसी श्रेष्ठ, प्रकाश मनि पौडेल, रबि राजकर्निकार र प्रज्वल वली रहेका छन् ।
कार्यकममा नेपालका लागि कतारका राजदुत युसुफ अल हैल, नियोग उपप्रमुख खालिद इब्राहिम, नेपालका लागि साउदी अरेबियाका राजदुत साद अबुहैमेद, संयुक्त अरब इमिरेटसका राजदुत सइद हमदान अल नक्वी, रिपब्लिक इजिप्टका राजदुत नोना अहमद, परराष्ट्र सचिव भरत राज पौड्यालले लक्की ड्रबाट फुटबल जित्नेहरुलाई फुटबल प्रदान गरेका थिए ।
अबको २८ दिनमा शुरू हुने विश्वकपको पहिलो खेल ६० हजार दर्शक क्षमता भएको अल-बायत रंगशालामा हुनेछ । २० नोभेम्बरमा हुने पहिलो खेलमा कतार र इक्वेडर भिड्नेछन् ।
कतारले आयोजना गरेको गर्न लागेको बहुप्रतीक्षित विश्वकप फुटबल मध्यपूर्व र अरब विश्वकै पहिलो फिफा विश्वकप-२०२२ हो । आगामी २० नोभेम्बरदेखि १८ डिसेम्बर ९करिब एक महिना०सम्म चल्ने विश्वकपमा ६४ खेल खेलाउनका लागि कतारले आठ अत्याधुनिक रंगशाला बनाइसकेको छ।
अल-बायत स्टेडियममा उद्घाटन खेल खेलाउने तय भएको विश्वकप फुटबल प्रतियोगिता अन्तर्गत फाइनल खेल भने कतार राज्यको राष्ट्रिय दिवस १८ डिसेम्बरका दिन लुसैल रंगशालामा हुनेछ ।
लुसैल रंगशाला सबैखाले सेवा सुविधा सहित ८० हजार दर्शक क्षमताको छ ।विश्वकप फुटबल प्रतियोगिता आयोजना गर्ने एउटा रंगशालाबाट अर्को रंगशालासम्म पुग्न झन्डै एक घण्टाको समय लाग्ने गरी निर्माण गरिएको बताइएको छ । सबै रंगशाला यातायातका सबैखाले सुविधासँग जोडिएको छ ।
विश्वकप फुटबल प्रतियोगिताको समयावधिमा अधिक दर्शक चाप हुने भएकाले कतारले यातायात, रेल प्रणाली, सडक सञ्जाल, होटेल, अपार्टमेन्ट र एयरपोर्ट, सामुन्द्रिक पोर्ट लगायतका पुर्वाधारको निर्माण एवं स्तरोन्नति गरिसकेको समेत कार्यक्रममा जानकारी गराइएको थियो ।
