धनगढी । गोदावरी नगरपालिकाले कैलालीको गेटास्थित शहीद दशरथ चन्द मेडिकल कलेज परिसरमा वृहत् सरसफाइ गरेको छ ।
शुक्रबार प्रमुख प्रशासकीय अधिकृत धर्मराज विनाडीको नेतृत्वमा जनप्रतिनिधि, कर्मचारी तथा नगर प्रहरीको टोली विश्वविद्यालय परिसर पुगेको थियो । टोलीले झाडी सफा गर्ने, घाँस काट्ने तथा मैदान सम्याउने कार्य गरेको हो ।
नगरपालिकाले डोजर, एक्स्काभेटर र ट्याक्टरलगायतका उपकरण परिचालन गरी परिसरभित्र फैलिएको झाडी हटाउने र जमिन सम्याउने काम गरेको जनाएको छ ।
विश्वविद्यालयले परिसरमा बढेको झाडीका कारण सरसफाइ, सौन्दर्य तथा सुरक्षामा चुनौती देखिएको भन्दै केही दिनअघि सार्वजनिक रूपमा सहयोगको आह्वान गरेको थियो । सोही आह्वानपछि गोदावरी नगरपालिकाले जनशक्ति र आवश्यक उपकरणसहित सरसफाइ अभियानमा सहयोग गरेको हो ।
विश्वविद्यालय परिसरमा केही दिनदेखि निरन्तर सरसफाइ अभियान सञ्चालन भइरहेको छ ।
