धनगढी । सुदूरपश्चिम प्रदेश सरकारमा सहभागी नेकपा एमालेका मन्त्री तथा राज्यमन्त्रीहरूलाई पत्रकार वीरेन्द्र रावलले पार्टीको नीति, निर्देशन र जनताको सुझावलाई आत्मसात गर्दै काम गर्न सुझाव दिएका छन्।
रावलले एमालेबाट सरकारमा सहभागी मन्त्रीहरूले पार्टीका कमिटीगत निर्णय, नीति निर्देशन तथा नेता–कार्यकर्ता र जनताको सुझावलाई आत्मसात गरेर अघि बढ्नुपर्ने बताएका छन्। उनले विगतमा नयाँ भनाउँदाहरूले लगाएका आरोप–प्रत्यारोपको पुनरावृत्ति गर्ने कार्य नगर्नसमेत आग्रह गरेका छन्।
उनले मन्त्रीहरूको सचिवालयमा नातावाद, कृपावाद, क्षेत्रीयतावाद र आफन्तवादको गन्ध आउन नहुने बताएका छन्। विकास निर्माणका योजनामा आफ्नो क्षेत्र, जिल्ला, समुदाय वा जातजातिलाई प्राथमिकता नदिई सुदूरपश्चिमका ८८ वटै स्थानीय तहमा आवश्यकताका आधारमा बजेट विनियोजन गर्नुपर्ने उनको सुझाव छ।
पार्टी कमिटीले सिफारिस गरेका आवश्यकतामा आधारित योजनालाई प्राथमिकतामा राखेर बजेट विनियोजन गर्नुपर्ने रावलको भनाइ छ। मन्त्री पद र कुर्सीको दम्भ देखाउने, सार्वजनिक सवारीसाधन तथा राज्यका स्रोत–साधनको दोहन र दुरुपयोग गर्ने कार्यबाट समेत टाढा रहन उनले आग्रह गरेका छन्।
‘सकिन्छ राम्रो गर्नुहोस्, सकिँदैन नराम्रो नगर्नुस्,’ रावलले भनेका छन्, ‘जनताको भावनाको पूर्णरूपमा कदर गर्नुपर्छ।’
त्यसैगरी उनले मन्त्रीहरूलाई हुक्के, ढुक्के, चम्चे, फिरन्ते र बिचौलियाको फन्दाबाट टाढा रहन सुझाव दिएका छन्। जनताले विश्वास गरेर दिएको जिम्मेवारीलाई पारदर्शी, जिम्मेवार र जनमुखी ढंगले निर्वाह गर्नुपर्ने उनको भनाइ छ।