धनगढी । सुदूरपश्चिम प्रदेशका मुख्यमन्त्री खगराज भट्टले राष्ट्रिय गौरवको आयोजनाका रूपमा रहेको पश्चिम सेती जलविद्युत परियोजना निर्माण अघि बढाउन प्रदेश सरकारले आवश्यक सबै किसिमको सहयोग गर्ने बताएका छन ।
भारतीय जलविद्युत कम्पनी NHPC का वरिष्ठ अधिकारी सुरेश मीनासँग भएको छलफलका क्रममा मुख्यमन्त्री भट्टले पश्चिम सेती परियोजना जुनसुकै अवस्थामा पनि निर्माण हुनुपर्ने बताए ।
उनले परियोजना सञ्चालनमा आए सुदूरपश्चिम प्रदेश मात्र नभई समग्र मुलुकको विकास र समृद्धिमा महत्वपूर्ण योगदान पुग्ने धारणा व्यक्त गरे ।
छलफलका क्रममा NHPC का वरिष्ठ अधिकारी सुरेश मीनाले परियोजनाको पछिल्लो प्रगतिको अवस्थाबारे मुख्यमन्त्री भट्टलाई जानकारी गराएका थिए । उनका अनुसार परियोजनाको डीपीआर पेश भइसकेको छ भने बाँकी काम अघि बढाउन NHPC तयार रहेको छ।
मीनाले परियोजना निर्माणका क्रममा आवश्यक पर्ने सहयोग र सहजीकरणका लागि सुदूरपश्चिम प्रदेश सरकारसँग अपेक्षा रहेको बताए ।
जवाफमा मुख्यमन्त्री भट्टले पश्चिम सेती परियोजना अघि बढाउन प्रदेश सरकारले आवश्यक सहयोग गर्ने प्रतिबद्धता व्यक्त गरे । उनले संघीय सरकारसँग गर्नुपर्ने समन्वय तथा सहजीकरणमा समेत प्रदेश सरकारले आवश्यक भूमिका निर्वाह गर्ने बताए ।
लामो समयदेखि चर्चामा रहेको पश्चिम सेती परियोजना निर्माणले गति लिए यस क्षेत्रको पूर्वाधार विकास, रोजगारी सिर्जना र आर्थिक गतिविधिमा महत्वपूर्ण परिवर्तन ल्याउने अपेक्षा गरिएको छ।
