धनगढी । नेकपा (एमाले) सुदूरपश्चिम प्रदेश कमिटीले प्रदेश सरकारमा सहभागी पार्टीका मन्त्री, राज्यमन्त्री तथा प्रदेशसभा सदस्यहरूलाई सचिवालयमा कर्मचारी तथा सहयोगी नियुक्त गर्दा नातागोता र पारिवारिक सम्बन्ध भएकालाई नराख्न निर्देशन दिएको छ ।
प्रदेश अध्यक्ष कृष्णप्रसाद जैशीले मन्त्री तथा प्रदेशसभा सदस्यहरूलाई पठाएको पत्रमा भनिएको छ‘सचिवालय व्यवस्थापनमा योग्य, सक्षम र पार्टीप्रति प्रतिवद्ध व्यक्तिलाई अवसर प्रदान गर्दा उपयुक्त देखिन्छ ।’
पछिल्लो समय केही सचिवालयमा आफन्त तथा नजिकका व्यक्तिहरूलाई प्राथमिकता दिइएको र पार्टी संगठन तथा जिल्लास्तरमा सक्रिय कार्यकर्ताले अवसर नपाएको गुनासो बढेको पत्रमा उल्लेख छ । पत्रमा कर्मचारी तथा सहयोगी छनोट गर्दा योग्यता, क्षमता, अनुभव, जिम्मेवारी निर्वाह गर्ने दक्षता र पार्टीप्रतिको प्रतिवद्धलाई प्रमुख आधार बनाउन भनिएको छ।
जिल्ला तथा प्रदेशस्तरमा पार्टी संगठन विस्तार र सुदृढीकरणका लागि खटिएर काम गरिरहेका नेता(कार्यकर्तालाई सचिवालयमा अवसर दिनसमेत ध्यानाकर्षण गराइएको छ।
