धनगढी । धनगढी उपमहानगरपालिका–५ जाइका बिरेन्द्र चौधरी अहिले आफ्नै व्यवसायमा व्यस्त छन् । घरायसी सामानको व्यापार गर्दै आएका चौधरीका लागि यो व्यवसाय केवल आम्दानीको माध्यम मात्रै बनेको छैन, आत्मनिर्भर बन्ने आधारसमेत बनेको छ ।

बिरेन्द्र ट्रेड सप्लायर्स सञ्चालन गर्दै आएका चौधरीले केही समयअघिसम्म बुबाले सञ्चालन गर्दै आएको किराना पसलमा बुबासँगै काम गर्थे । बुबाको व्यवसायमा सघाउँदै आएका उनलाई आफ्नै केही गर्नुपर्छ भन्ने सोच आयो । त्यसपछि बुबाको पसल नजिकै उनले घरायसी सामानको छुट्टै व्यवसाय सुरु गरे ।

‘बुबासँगै काम गर्दै आएँ । तर आफूले पनि केही गर्नुपर्छ भन्ने लाग्यो,’ चौधरी भन्छन्, ‘त्यसैले बुबाको पसल नजिकै आफ्नै व्यवसाय सुरु गरेको हुँ । व्यवसाय फरक भए पनि बुबासँग सरसल्लाह गरेर नै अघि बढिरहेको छु ।’

आफ्नो व्यवसाय सुरु गर्न उनलाई आर्थिक स्रोतको आवश्यकता थियो। त्यही बेला उनको साथ बन्यो—हिमशिखर बहुउद्देश्यीय सहकारी संस्था ।

चौधरीले हिमशिखरबाट तीन लाख रुपैयाँ ऋण लिएर बिरेन्द्र ट्रेड सप्लायर्स सञ्चालनमा ल्याएका हुन् । सहकारीबाट सहज रूपमा ऋण पाएपछि व्यवसाय सुरु गर्न आफूलाई ठूलो सहयोग पुगेको उनी बताउँछन् ।

‘हिमशिखरबाट तीन लाख रुपैयाँ ऋण लिएर यो व्यवसाय सुरु गरेको हुँ,’ उनी भन्छन्, ‘पसल पनि राम्रो चलेको छ ।

सहकारीको साँवा–ब्याज नियमित रूपमा तिर्दै आएको छु ।’

हिमशिखरसँग चौधरी परिवारको सम्बन्ध भने नयाँ होइन। यसअघि बुबाले सञ्चालन गर्दै आएको किराना पसलका लागि समेत हिमशिखरबाट ऋण लिइएको थियो । त्यही सहकारीसँगको विश्वास र सहकार्यलाई निरन्तरता दिँदै बिरेन्द्रले आफ्नै व्यवसाय अघि बढाएका हुन् ।

व्यवसायबाट हुने आम्दानीले अहिले उनको परिवारको दैनिकी सहज बनाएको छ । ६ सदस्यीय परिवारको घरखर्चदेखि छोराछोरीको पढाइसम्म यही व्यवसायको आम्दानीबाट चलिरहेको छ । परिवारका सदस्यहरूले आम्दानीको केही हिस्सा नियमित रूपमा हिमशिखरमा बचतसमेत गर्दै आएका छन् ।

चौधरीका लागि सहकारीको ऋण केवल रकम प्राप्त गर्ने माध्यम मात्रै बनेन, व्यवसाय सुरु गर्ने अवसरसमेत बन्यो । बिना झन्झट सहज रूपमा ऋण उपलब्ध हुँदा आफूजस्ता साना व्यवसायीलाई उद्यम गर्न ठूलो हौसला मिल्ने गरेको उनको अनुभव छ ।

‘सहकारीको सहज ऋण सुविधाले व्यापार व्यवसाय गर्न धेरै सजिलो भएको छ,’ उनी भन्छन्, ‘ऋण पाएपछि व्यवसाय विस्तार गर्न र आम्दानी गर्न सहज भयो । अहिले आर्थिक अवस्था पनि पहिलेभन्दा राम्रो भएको छ ।’

हिमशिखरबाट लिएको ऋणलाई सही ठाउँमा सदुपयोग गरेर व्यवसाय सञ्चालन गरेका चौधरी अहिले नियमित रूपमा साँवा–ब्याज भुक्तानीसँगै बचतसमेत गर्दै आएका छन् । उनका लागि यो व्यवसाय आम्दानीको स्रोत मात्र नभई भविष्य निर्माणको आधार बनेको छ ।

सहकारीको सहज ऋण, आफ्नै मेहनत र व्यवसायप्रतिको निरन्तरताले बिरेन्द्रलाई अहिले अरूको व्यवसायमा काम गर्ने अवस्थाबाट आफ्नै व्यवसाय सञ्चालन गर्ने आत्मनिर्भर व्यवसायीका रूपमा उभ्याएको छ ।