धनगढी । रोजगारीको खोजीमा विदेश जाने तयारीमा रहेका चुरे गाउँपालिका–१ निगालीका बमबहादुर बोहरा अहिले आफ्नै व्यवसायमा जमिसकेका छन्। विदेश गएर अर्काको देशमा पसिना बगाउनुभन्दा आफ्नै देशमा केही गर्नुपर्छ भन्ने सोचले उनले विदेश जाने योजना त्यागेर स्वदेशमै व्यवसाय सुरु गरे।
विदेश जाने तयारीमा पासपोर्टसमेत बनाइसकेका बोहराले अन्ततः पासपोर्ट रद्द गरे। त्यसपछि आफ्नै ठाउँमा व्यवसाय गर्ने योजना बनाए। व्यवसाय सुरु गर्न उनलाई आर्थिक स्रोतको अभाव थियो। त्यही बेला हिमशिखर सहकारी संस्थाले दिएको ऋण सहयोग उनका लागि व्यवसायिक यात्राको आधार बन्यो।
बोहराले २०७८ सालमा हिमशिखर सहकारीबाट ८ लाख रुपैयाँ ऋण लिएर ‘बीएस कटेज’ सञ्चालनमा ल्याए। सुरुवाती चरणमा चिया–नास्ताबाट व्यवसाय सुरु गरेका उनले विस्तारै ग्राहकको विश्वास जित्दै व्यापार बढाउँदै लगे।
व्यवसायबाट आम्दानी राम्रो हुन थालेपछि उनले पुनः हिमशिखरबाट ३ लाख रुपैयाँ ऋण लिएर व्यवसायलाई थप व्यवस्थित गरे। व्यापार विस्तार गर्ने क्रममा थप २ लाख रुपैयाँ ऋण लिएर अहिले धनगढी उपमहानगरपालिका–१ मा ‘एम्मी सेकुवा सेन्टर’ सञ्चालन गर्दै आएका छन्।

मालपोत जाने सडकमा रहेको एम्मी सेकुवा सेन्टरमा अहिले मटन सेकुवा, खसीको भुटन, सुव व्वाइल कचमली, कर्क सेकुवालगायतका परिकार पाइन्छन्। ग्राहकको मागअनुसार खानाको समेत व्यवस्था हुने गरेको बोहरा बताउँछन्।
उनका अनुसार दैनिक करिब १५ हजार रुपैयाँसम्मको बिक्री हुने गरेको छ। सबै खर्च कटाएर दैनिक करिब २ हजार रुपैयाँ बचत हुने गरेको उनी बताउँछन्।
“व्यापारबाट म एकदमै सन्तुष्ट छु। हिमशिखर सहकारी संस्थाका कारण आज म यो अवस्थामा पुगेको हुँ,” बोहराले भने, “म विदेश गएको भए कस्तो दुःख पाउँथेँ थाहा छैन, तर हिमशिखरको सहयोगले नेपालमै व्यवसाय गर्ने अवसर पाएँ। अहिले राम्रै भएको छ।”
बोहरा आफैं भने दिनमा एम्बुलेन्स चलाउने कामसमेत गर्छन्। पछिल्लो समय एम्मी सेकुवा सेन्टरको अधिकांश जिम्मेवारी उनकी श्रीमतीले सम्हाल्दै आएकी छन्। व्यवसायसँगै उनले परिवारको जिम्मेवारी पनि निरन्तर निर्वाह गरिरहेका छन्।
छ जनाको परिवार रहेका बोहराका जेठा छोरा कक्षा ५, दुई छोरी मध्ये एक छोरी १० मा अर्को छोरी कक्षा ६ र कान्छा छोरा एलकेजीमा अध्ययनरत छन्। आफ्नै व्यवसायका कारण परिवारसँगै बसेर छोराछोरीको पढाइ र घरायसी जिम्मेवारी पूरा गर्न पाएकोमा उनी खुसी छन्।
“विदेश गएर कमाउनुभन्दा आफ्नै देशमा संघर्ष गर्न सके पनि केही गर्न सकिने रहेछ,” उनी भन्छन्, “अहिले परिवारसँगै बसेर काम गर्न पाएको छु। यही नै मेरो ठूलो खुसी हो।”
हिमशिखरबाट लिएको ऋणसमेत तिरिसकेपछि पुनः ऋण लिएर व्यवसाय विस्तार गर्ने योजना बोहराको छ। मेहनत, निरन्तरता र सही समयमा पाएको आर्थिक सहयोगले विदेशिने सोच बनाएका बोहरालाई अहिले स्वदेशमै उद्यमीका रूपमा स्थापित गरेको छ।