काठमाडौँ । हाम्रा केही बानीहरू यति सामान्य भइसकेका छन्, हामी तिनलाई स्वास्थ्यका लागि हानिकारक नै ठान्दैनौँ।

खाना खाँदा मोबाइल फोन प्रयोग गर्नु वा भोक नलागेको बेला बारम्बार केही न केही खाइरहनु यस्तै बानीभित्र पर्छन्।

यी साना बानीले बिस्तारै हाम्रो स्वास्थ्य र पाचन प्रणालीमा असर पुर्‍याउन सक्छन्। त्यसैगरी, पानी पिउन लापरबाही गर्नु वा शौचालय जाने आवश्यकतालाई बारम्बार बेवास्ता गर्नु पनि राम्रो होइन।

आजको यस लेखमा हामी यस्तै केही बानीबारे चर्चा गर्नेछौँ, जसलाई समयमै सुधारिएन भने अनेकौँ स्वास्थ्य समस्याको सामना गर्नुपर्ने हुन्छ।

खाना खाँदा मोबाइल फोनको प्रयोग
खाना खाँदा लगातार मोबाइल फोन चलाउने बानीले तपाईंको खानपिनको तरिकालाई असर गर्न सक्छ। स्क्रिनमा ध्यान केन्द्रित गर्दा आफूले कति खाइयो वा पेट भरियो वा भरिएन भन्ने पत्तै हुँदैन। यसले गर्दा आवश्यकताभन्दा बढी खाइन्छ। तसर्थ, खाना खाने बेलामा टिभी, मोबाइल फोन वा अन्य स्क्रिनबाट टाढा रहेर शान्तसँग बिस्तारै र ध्यानपूर्वक खाना खानु बेस हुन्छ।

नियमित तालिकाबिनै खाना छाड्नु
धेरै मानिस तौल घटाउने भन्दै बिहानको खाजा वा दिउँसोको खाना छाड्ने गर्छन्। कहिलेकाहीँ खाना नखानु सामान्य कुरा हो, तर नियमित रूपमा कुनै तालिकाबिना यसरी खाना छाड्दा यसले आहारलाई असन्तुलित बनाउँछ। यसले गर्दा पछि भोक लाग्दा शरीरलाई चाहिनेभन्दा बढी खाने जोखिम बढ्छ। कुनै पनि समयको खाना छाड्नु समस्याको समाधान होइन, यसले उल्टै अन्य स्वास्थ्य समस्या निम्त्याउँछ।

खाना खाएपछि सधैँ मिठाई खानु
केही व्यक्तिमा खाना खानेबित्तिकै मिठाई, चकलेट वा अन्य गुलियो खानेकुरा खाने बानी हुन्छ। तपाईं पनि यही सूचीमा पर्नुहुन्छ भने सचेत हुनुहोस्। यस्तो बानीले शरीरमा चिनी र क्यालोरीको मात्रा बढाउँछ। यो दैनिक बानी नै बनेमा लामो समयपछि तौल अस्वाभाविक रूपमा बढ्न सक्छ। हरेक पटक खाना खाएपछि मिठाई खानु आवश्यक छैन। यदि तपाईंलाई गुलियो खान मन लागेमा फलफूल जस्ता स्वस्थकर खानेकुरा खान सक्नुहुन्छ।

राति एकैपटक धेरै पानी पिउनु
केही मानिस दिनभरि पानी पिउन बिर्सन्छन् अनि साँझ वा राति एकैचोटि धेरै पानी पिउँछन्। शरीरलाई स्वस्थ ९हाइड्रेटेड० राख्न दिनभरि पानी पिउनु जरुरी हुन्छ। एकैचोटि धेरै पानी पिउनुको सट्टा तिर्खा, मौसम र शरीरको आवश्यकताअनुसार दिनभरि अलिअलि गरेर पानी पिउनुहोस्। सुत्नुभन्दा ठिक अगाडि धेरै पानी पिउनाले राति बारम्बार पिसाब लाग्ने र निद्रा बिथोलिने समस्या हुन सक्छ।

खानाको बिचमा केही न केही खाइरहनु
भोक नलागे पनि बारम्बार केही न केही खाइरहने अर्को नराम्रो बानी हो। लगातार कुटुरकुटुर केही खाइरहने बानीले दैनिक क्यालोरीको मात्रा बढाउँछ। विशेषगरी चिप्स, बिस्कुट जस्ता नुनिलो वा गुलियो ‘जङ्क फुड’ खाइन्छ भने यसले झनै समस्या बढाउँछ। यदि तपाईंलाई के खाऊँ के खाऊँ भइरहन्छ वा भोक लागेको महसुस हुन्छ भने फलफूल, बदाम, दही वा अन्य स्वस्थकर खानेकुरा खानुहोस्। तनाव, अल्छीपन वा बानीकै कारण अस्वस्थकर खानेकुरा खाने बानी आजै त्याग्नुहोस्।

समयमै शौचालय नजानु
अल्छी लागेकै कारण केही मानिस पिसाब वा दिसा लाग्दा पनि समयमै शौचालय जाँदैनन्। यस्तो बानीले कब्जियत जस्ता गम्भीर समस्या निम्त्याउनुका साथै पिसाब फेर्दा पोल्ने वा सङ्क्रमण हुने जोखिम बढाउँछ।एजेन्सी