धनगढी । कैलालीको धनगढी उपमहानगरपालिका–१३ मा रहेको प्रादेशिक आयुर्वेद चिकित्सालय पछिल्लो समय बिरामीको रोजाइमा पर्न थालेको छ। सुदूरपश्चिम प्रदेशका नौवटै जिल्लाबाट आयुर्वेदिक पद्धतिबाट उपचार गराउन बिरामीहरू चिकित्सालय पुग्न थालेका छन्।
विभिन्न स्वास्थ्य समस्याका लागि लामो समयसम्म अन्य अस्पतालमा उपचार गराउँदा समेत सुधार नभएका बिरामीहरू आयुर्वेदिक उपचारबाट लाभ पाएपछि चिकित्सालयप्रति आकर्षित हुन थालेका हुन्।
दार्चुलाको अपि हिमाल गाउँपालिका–३ का रतन कार्की यसको उदाहरण हुन्।
दुवै खुट्टामा समस्या देखिएर प्यारालाइसिस भएपछि उनले विभिन्न अस्पतालमा उपचार गराए। तर, उपचारबाट अपेक्षित सुधार नभएपछि अन्ततः उनी आयुर्वेदिक उपचारका लागि धनगढीस्थित प्रादेशिक आयुर्वेद चिकित्सालय पुगे।
चिकित्सालय आउँदा बैसाखीको सहारामा हिँड्ने अवस्थामा रहेका कार्की अहिले सामान्य रूपमा हिँडडुल गर्न सक्ने भएका छन्।
प्रादेशिक आयुर्वेद चिकित्सालयका आयुर्वेदिक वैद्य तथा अभ्यङ्गकर्ता कमलबहादुर धामीका अनुसार कार्कीलाई चिकित्सालयमा नियमित उपचार तथा आवश्यक समय दिएर उपचार गरिएको थियो। उनका अनुसार कार्कीको उपचारमा वस्ती, पूर्वकर्मअन्तर्गत स्नेहन र स्वेदन विधि प्रयोग गरिएको थियो।
“उहाँ चिकित्सालय आउँदा बैसाखीको सहारामा हुनुहुन्थ्यो। उपचारमा आवश्यक समय र ध्यान दिएपछि अहिले पहिलेकै अवस्थामा फर्किनुभएको छ,” वैद्य धामीले बताए।
चिकित्सालयमा पञ्चकर्मअन्तर्गत वमन, विरेचन, नस्य, शिरोधारा र वस्ती लगायतका उपचार विधि प्रभावकारी बन्दै गएको आयुर्वेदिक वैद्य तथा अभ्यङ्गकर्ता लक्ष्मण अवस्थीले बताए।
उनका अनुसार विशेषगरी नसासम्बन्धी समस्या भएका बिरामी उपचारका लागि दैनिक ठूलो संख्यामा आउने गरेका छन्।
“नसा च्यापिएका लगायतका समस्या भएका करिब २५ जना बिरामी दैनिक उपचारका लागि आउने गरेका छन्,” अवस्थीले भने।
उपचारपछि स्वास्थ्यमा सुधार आएको कार्कीले आयुर्वेद चिकित्सालय आफ्नो लागि भगवान् सावित भएको बताए।
“मेरा दुवै खुट्टा अपाङ्गजस्तै भएका थिए। धेरै अस्पतालमा उपचार गराएँ तर कतैबाट सम्भव भएन। अन्ततः यहाँ आएँ। छोटो समयको उपचारपछि अहिले पहिलेजस्तै हिँड्न सक्ने भएको छु,” उनले भने।
आयुर्वेदिक उपचारबाट नयाँ जीवन पाएको महसुस भएको बताउँदै कार्कीले आफ्नो उपचारमा संलग्न चिकित्सक तथा आयुर्वेदिक वैद्य–अभ्यङ्गकर्ताप्रति आभार व्यक्त गरे।
