लम्की । कैलालीको लम्कीचुहा नगरपालिका–१ मा मुख्य कार्यालय रहेको किसान बहुउद्देश्यीय सहकारी संस्था लिमिटेड र टीकापुर नगरपालिका–१ स्थित ओम कृष्ण अस्पताल तथा रिसर्च सेन्टर प्रालिबीच स्वास्थ्य सेवा तथा सहुलियत प्रदान गर्ने सम्बन्धमा द्विपक्षीय सम्झौता भएको छ।

‘स्वस्थ सदस्य, समृद्ध समुदाय’ भन्ने उद्देश्यका साथ बुधबार आयोजित विशेष समारोहमा दुई संस्थाबीच सम्झौता–पत्रमा हस्ताक्षर गरिएको हो। सम्झौतासँगै लम्कीचुहा र टीकापुर नगरपालिका, जानकी तथा जोशीपुर गाउँपालिका र बर्दियाको राजापुर नगरपालिका क्षेत्रमा बसोबास गर्ने सहकारीका २३ हजारभन्दा बढी शेयर सदस्य तथा उनीहरूका एकाघरका आश्रित परिवार प्रत्यक्ष लाभान्वित हुने भएका छन्।

उपचारमा १० देखि २० प्रतिशतसम्म छुट

सम्झौता अनुसार किसान सहकारीका सदस्य तथा उनीहरूका एकाघरका परिवारले ओम कृष्ण अस्पतालबाट विभिन्न स्वास्थ्य सेवा लिँदा न्यूनतम १० देखि अधिकतम २० प्रतिशतसम्म छुट पाउनेछन्।

अस्पतालले जनरल बेड तथा क्याबिनमा भर्ना, आईसीयू, एनआईसीयू, सामान्य तथा जटिल शल्यक्रिया, ल्याब परीक्षण, भिडियो एक्सरे, एक्सरे र अस्पतालको आफ्नै फार्मेसीबाट औषधि खरिदमा तोकिएको सहुलियत उपलब्ध गराउनेछ।

यस्तै, ओपीडी दर्ता तथा एमबीबीएस चिकित्सकको परामर्श शुल्क अधिकतम रु. १५० कायम गरिएको छ भने नियमित फलोअप परामर्श निःशुल्क हुने व्यवस्था गरिएको छ।
सहुलियत लिन सेवाग्राहीले अस्पतालको शुल्क भुक्तानी गर्नुअघि किसान सहकारीले जारी गरेको आधिकारिक शेयर सदस्य परिचयपत्र वा सम्बन्धित शाखा कार्यालयको सिफारिसपत्र पेश गर्नुपर्नेछ।

समुदायस्तरमा स्वास्थ्य कार्यक्रम सञ्चालन हुने
सम्झौतापछि ओम कृष्ण अस्पतालका प्रबन्ध निर्देशक कृष्णप्रसाद उपाध्याय (बजगाईं)ले सहकारीका सदस्यलाई सहुलियत दरमा गुणस्तरीय स्वास्थ्य सेवा उपलब्ध गराउन पाउँदा खुसी व्यक्त गर्नुभयो। उहाँले अत्याधुनिक प्रविधि तथा उपकरण र विशेषज्ञ चिकित्सकको निगरानीमा अस्पतालले प्रदान गरिरहेको स्वास्थ्य सेवाबाट सदस्यहरूले प्रत्यक्ष लाभ लिने विश्वास व्यक्त गर्नुभयो।

किसान बहुउद्देश्यीय सहकारी संस्थाका महाप्रबन्धक डम्बरबहादुर शाहले सदस्यलाई वित्तीय कारोबारसँगै सामाजिक सुरक्षा तथा स्वास्थ्य सेवामा समेत प्रत्यक्ष टेवा पुर्‍याउने उद्देश्यले अस्पतालसँग सहकार्य गरिएको बताउनुभयो। उहाँले सम्झौताबाट प्राप्त हुने स्वास्थ्य सहुलियतको अधिकतम लाभ लिन सदस्य तथा उनीहरूका परिवारलाई आग्रह गर्नुभयो।

सम्झौता अनुसार दुई संस्थाको संयुक्त पहलमा समुदायस्तरमा निःशुल्क स्वास्थ्य शिविर, मातृशिशु कल्याण तथा विभिन्न स्वास्थ्य सचेतनामूलक कार्यक्रमसमेत सञ्चालन गरिने भएको छ।

सुदूरपश्चिम प्रदेश तथा लुम्बिनी प्रदेशको राजापुर नगरपालिका कार्यक्षेत्र रहेको किसान बहुउद्देश्यीय सहकारी संस्थामा हाल ७६ हजार ८८४ जना शेयर सदस्य आबद्ध रहेका छन्।