धनगढी । सुदूरपश्चिम प्रदेशका मुख्यमन्त्री खगराज भट्टले होटल व्यवसायीहरूको माग स्वरोजगार र उत्पादनसँग जोडिएको विषय भएकाले प्रदेश सरकारले यसलाई गम्भीरताका साथ लिएर आवश्यक सहयोग गर्ने बताएका छन।
आज होटल संघ नेपाल (हान) को पहिलो प्रदेश साधारणसभालाई सम्बोधन गर्दै मुख्यमन्त्री भट्टले होटल व्यवसायले पर्यटन प्रवर्द्धन, अर्थतन्त्र सुदृढीकरण तथा रोजगारी सिर्जनामा महत्वपूर्ण भूमिका निर्वाह गरिरहेको बताए ।
होटल तथा पर्यटन क्षेत्रको विकासका लागि निजी क्षेत्रलाई प्रोत्साहन गर्दै प्रदेश सरकारले आवश्यक सहजीकरण र सहयोग गर्ने उनको भनाइ थियो।
निजी क्षेत्रको लगानीको सुरक्षा, व्यवसाय सञ्चालनमा आवश्यक सहजीकरणलगायतका विषयमा प्रदेश सरकार सकारात्मक रहेको उल्लेख गर्दै मुख्यमन्त्री भट्टले सरकार र निजी क्षेत्रबीचको सम्बन्ध माछा र पानीको जस्तै हुनुपर्ने बताए ।
सरकार र निजी क्षेत्र एकअर्काका परिपूरक भएकाले सहकार्य र साझेदारीबाट मात्रै प्रदेशको आर्थिक विकासलाई गति दिन सकिने उनले स्पष्ट पारे ।
सुदूरपश्चिम प्रदेशमा पर्यटन, कृषि, जलस्रोत, उद्योग तथा अन्य क्षेत्रमा अपार सम्भावना रहेको उल्लेख गर्दै मुख्यमन्त्री भट्टले ती सम्भावनालाई व्यवहारमा रूपान्तरण गर्न निजी क्षेत्रसँग सहकार्य आवश्यक रहेको बताए ।
निजी क्षेत्रको लगानीलाई आकर्षित गर्दै रोजगारी र उत्पादन बढाउने तथा प्रदेशको आर्थिक समृद्धिको अभियानलाई थप प्रभावकारी बनाउने दिशामा प्रदेश सरकार अघि बढ्ने प्रतिवद्धता समेत मुख्यमन्त्री भट्टले व्यक्त गरे ।
