धनगढी । नेपाली कांग्रेस कैलाली क्षेत्र नं. ५ ले धनगढी–१७ को मिलनपुर शिविरमा आयोजना गरेको निःशुल्क स्वास्थ्य शिविरमा ३०६ जनाको स्वास्थ्य परीक्षण गरिएको छ। शिविरमा स्वास्थ्य परीक्षणसँगै आवश्यक औषधिसमेत निःशुल्क वितरण गरिएको आयोजकले जनाएको छ।शिविरमा स्थानीय बासिन्दाको उत्साहजनक सहभागिता रहेको थियो। आर्थिक लगायत विभिन्न कारणले नियमित स्वास्थ्य परीक्षण गराउन नसक्ने समुदायलाई लक्षित गरी शिविर सञ्चालन गरिएको नेपाली कांग्रेस कैलाली क्षेत्र नम्बर ५ का प्रवक्ता प्रदिप पाठकले जानकारी दिए।
त्यस्तै नेपाली कांग्रेस कैलाली क्षेत्र नं. ५ का सभापति भीम पडालले राजनीतिक दलले जनतालाई केवल मतदाताका रूपमा मात्र नभई उनीहरूको सुख–दुःखमा साथ दिने सामाजिक संस्थाका रूपमा पनि भूमिका निर्वाह गर्नुपर्ने बताए।
आयोजकका अनुसार स्वास्थ्य सेवाको पहुँचबाट टाढा रहेका समुदायलाई लक्षित गर्दै आगामी दिनमा पनि स्वास्थ्य परीक्षणलगायत सामाजिक सेवाका कार्यक्रम सञ्चालन गरिनेछ।
