धनगढी- कैलाली क्षेत्र नम्बर ५ का प्रतिनिधिसभा सदस्य उम्मेदवार डिल्लीराज पन्तले आफूलाई पनि पार्टीले लामो समयपछि सम्झिएको बताएका छन् । आइतबार धनगढीमा पन्त बन्धु समाजको भेटघाट कार्यक्रमलाई सम्बोधन गर्दै उनले विगतमा पार्टीले आफूलाई बेवास्ता गरेको भएपनि पछिल्लो समय सम्झिएको बताए ।
विगतमा पार्टीले आफूलाई जिम्मेवारीविहीन बनाएको भएपनि पार्टीविरुद्ध कहिल्यै नलागेको उनले बनाए । पार्टीमा भूमिगत जीवन पनि विताएको स्मरण गर्दै उनले २०४६ सालपछि मात्रै अघिल्लो चुनावमा पार्टीबाट प्रदेशसभा सदस्य र अहिले प्रतिनिधिसभाको टिकट पाएको बताए ।
यसपटक प्रतिनिधिसभाको टिकटका लागि आफूले मरिहत्ते नगरेको स्पष्ट पार्दै उनले भने, ‘मैले गरेको काम र मेरो छविलाई मुल्यांकन गर्दै पार्टीले सबैको सल्लाहमा मलाई प्रतिनिधिसभाको टिकट दिएको हो ।’
उम्मेदवार पन्तले आफूले टिकट पाइसकेपछि पूर्वराज्य मन्त्री पुस्करनाथ ओझासंग भेटघाट गरेर सहयोग गर्न आग्रहसमेत गरेको बताए । यद्यपि ओझाले आफू पनि चुनाव लड्ने तयारीमा रहेको भन्दै सहयोग गर्न नसकिने जवाफ दिएको उनले बताए । टिकट पाइसकेपछि मात्रै ओझाको सहयोग माग्नु गल्ती भएको हो कि भन्ने आफूलाई लागेको उनले बताए ।
‘मैले टिकट पाउँदैछु भन्ने संकेत पाइसकेपछि नै पुस्करनाथ ओझासंग सल्लाह गरेर सहयोगका लागि आग्रह गर्नुपर्ने थियो, मैले गल्ती गरे,’ उनले भने, ‘पछि टिकट पाइसकेपछि सहयोगका लागि आग्रह गर्दा उहाँले मान्नुभएन । अहिले हामी अलग–अलग बाटोमा छौं । मेरो विरोधमा कोही नहोलान् सोचेको थिएँ, तर भएन ।’
उनले अब एक भोट पाउने व्यक्ति पनि आफ्नो प्रतिस्पर्धी भएकाले सबैले एकजुट भएर लाग्नुपर्ने बताए । पहिले प्रदेशसभा चुनावमा सबैले सहयोग गरेर जितेको स्मरण गर्दै उनले अब पनि सोही खाँचो परेको बताए । कैलाली ५ मा सबै भन्दा बलियो पार्टी कांग्रेस भएपनि आन्तरिक असझदारीलगायतका कारण केही चुनावमा पराजय बेहोर्नु परेको भन्दै उम्मेदवार पन्तले अब सबै एकजुट भएर पार्टीलाई जिताउनुपर्ने बताए ।
