दार्चुला- आइतबार हुने प्रतिनिधि सभा र प्रदेश सभा निर्वाचनको तयारी पूरा भएको छ । निर्वाचनका लागि दार्चुलाका सबै मतदानस्थल तथा केन्द्रमा बुथ निर्माण गरिएको मुख्य निर्वाचन अधिकृत खेमराज भट्टले जानकारी दिए । सुरक्षाकर्मी, कर्मचारी र स्वयंसेवक मिलेर मतदान केन्द्रमा बुथ निर्माण गरिएको उनले बताए । मतदान गर्न जाने र फर्कने बाटो अलग–अलग हुने गरेर बुथ निर्माणको काम भएको उनको भनाइ छ ।
नौ वटा स्थानीय तह रहेको दार्चुलामा पुरुष ४५ हजार ५४३ र महिला ४३ हजार ६११ गरी कुल ८९ हजार १५४ मतदाता रहेका छन् । जिल्लाभरी ११२ मतदानस्थल १४१ मतदान केन्द्र र दुई वटा अस्थायी मतदान केन्द्र रहेका छन् । व्यास गाउँपालिका –१ छाङरु र तिङ्करको मतदान दार्चुला सदरमुकाम खलङ्गामै हुने भएको छ ।
जिल्लाभरी १४३ मतदान केन्द्रमा निर्वाचन गर्न मतदान अधिकृत १४३, सहायक मतदान अधिकृत १४३, सहायक कर्मचारी ६९९, कार्यालय सहयोगी १४३ गरी जम्मा एक हजार १२८ कर्मचारी र स्वयंसेवक ५२७ गरी कुल एक हजार ६५५ जना खटाइएका छन् । प्रमुख जिल्ला अधिकारी दीर्घराज उपाध्यायका अनुसार मतदानका लागि तीन तहको सुरक्षा घेरा बनाइएको छ । पहिलो घेरामा नेपाल प्रहरी, दोस्रो घेरामा सशस्त्र प्रहरी र तेस्रो घेरामा नेपाली सेनालाई राखिएको छ । जिल्लाभरी ५२८ नेपाल प्रहरी, ८२७ म्यादी प्रहरीसहित दुई हजार बढी सुरक्षाकर्मी परिचालन गरिएको उनले बताए।
मतदान सम्पन्न भएपश्चात् आइतबार बेलुकी मतपेटिका सदरमुकाम खलङ्गा ढुवानी गर्ने तयारी गरिएको छ । गाडी पुग्ने ठाउँमा मतपेटिका ढुवानीका लागि बसको व्यवस्था गरिएको उपाध्यायले बताए। यातायातको पहुँच नभएको ठाउँबाट सडकमार्गसम्म मानिसले बोकेर मतपेटिका सङ्कलन गर्नेगरी तयारी गरिएको मुख्य निर्वाचन अधिकृत खेमराज भट्टले बताए । मतपेटिका सङ्कलन भइसकेपछि मतगणना कार्य जिल्ला सदरमुकाम खलङ्गास्थित महेन्द्र नमुना माबिमा हुने बताइएको छ । मतगणनास्थलमा सिसिटिभी क्यामेरा जडान गरिएको छ ।
