धनगढी- प्रधानमन्त्री शेरबहादुर देउवाले पश्चिम सेती आयोजनालाई भारतीय कम्पनीले निर्माण गर्ने बताएका छन् । बिहीबार सुदूरपश्चिम महोत्सवको उद्घाटन समारोहलाई सम्बोधन गर्दै उनले आयोजना निर्माणको जिम्मा भारतीय कम्पनीले पाइसकेको बताए ।
उनले आयोजनाप्रति भारतीय प्रधानमन्त्री नरेन्द्र मोदीले समेत चासो देखाएको बताए । ‘भारतीय प्रधानमन्त्री नरेन्द्र मोदीजीले पश्चिम सेती आयोजनाबारे चासो राख्नुभएको छ,’ उनले भने, ‘पश्चिम सेती आयोजना निर्माण गर्ने भारतीय कम्पनी भरपर्दो कम्पनी पनि हो । ठग्ने खालको कम्पनी होइन ।’
पश्चिम सेती निर्माण सम्पन्न भइसकेपछि सुदूरपश्चिमको विकासमा ठूलो टेवा पुग्ने उनको भनाइ छ । देउवाले छिट्टै पञ्चेश्वर आयोजनाको काम पनि अघि बढ्ने बताए । सुदूरपश्चिममा गौरीफन्टा नाकामा भारतसँग कुरा गरेर सहज बनाउने उनले बताए ।
सुदूरपश्चिम प्रदेशको शिक्षा, स्वास्थपछि पर्यटन र आर्थिक विकास गर्नका लागि महोत्सव आयोजना भइरहेको भन्दै उनले उनले दुवै छिमेकीसँग सम्बन्ध जोडिएको प्रदेश भएकाले आर्थिक हबको रुपमा विकास गर्ने सम्भावना बताए ।
प्रदेश सरकार र स्थानीय सरकारले यहाँको विकासका लागि समन्वय गरि काम गर्नुपर्ने प्रधानमन्त्रीको भनाइ छ । स्थानीय सम्भावनाहरूलाई पहिचान गरि प्राकृतिक सम्भावनाहरूको पहिचान गरेर सुदूरपश्चिमको विकास गर्नुपर्ने उनले बताए ।
