एजेन्सी- भारतको राजस्थान राज्यमा विवाह भोजमा खाना पकाउने ग्यास सिलिन्डर विस्फोट हुँदा कम्तीमा पाँचजनाको मृत्यु भएको छ भने ५० जना घाइते भएका छन्।
राजस्थानको राजधानी जयपुरबाट ४३६ किलोमिटर पश्चिममा रहेको जोधपुर जिल्लाको भुङ्गरा गाउँमा बिहीबार विवाह समारोहमा पाहुना भेला भइरहेका वेला सिलिन्डर विस्फोट भएको हो। मृत्यु हुनेमा दुई बालबालिकासमेत रहेको जोधपुर जिल्ला कलेक्टर कार्यालयका एक अधिकारीले जानकारी छन्।
घाइतेहरू सबै जलेका र उनीहरूलाई नजिकैको अस्पतालमा लगिएको छ। तीमध्ये १२ जना गम्भीर घाइते भएका र उनीहरूलाई विशेष उपचारका लागि जोधपुर पठाइएको छ। अधिकारीहरूका अनुसार यो घटना बेहुलाको घरबाट जुलुस निस्कनुअघि नै भएको थियो। कार्यक्रममा करिब १०० जना जम्मा भएका थिए।
विवाह भोजको तयारी भइरहेको ठाउँमा ग्यास सिलिन्डर चुहिएर शक्तिशाली विस्फोट भएको अधिकारीले जानकारी दिए। विस्फोटका कारण विवाह भइरहेको घरको एक भाग पनि भत्किएको छ। भारतमा यस्ता आकस्मिक विस्फोट सामान्य छन् किनभने मानिसहरूले सामान्यतया सुरक्षा मापदण्डलाई बेवास्ता गर्छन्।
